Glúmur viðurkennir eitt og annað; til dæmis að hann sé „ekki handlaginn maður. Ég er vissulega með þrjár háskólagráður en að öðru leyti ónýtur til flestra hagnýtra verka.“
Bætir við:
„Svo þegar ég þurfti um daginn að setja upp gluggatjöld og festa sjónvarp á vegg auglýsti ég eftir starfskrafti á FB. Og uppskar hlátur margra. Þá hafði samband gamall félagi og benti mér á appið Giggó. Þar fann ég mann sem gekk strax í verkið. Og málið dautt.“
Þó ekki alveg dautt:
„En svo gerðist hið undarlega í hádeginu. Ég fékk símtal frá fréttamiðli sem kallar sig Heimildina. Blaðamaður spurði mig útí málið og bar upp ýmsar kynlegar spurningar einsog þessar: Notar þú Giggó oft? Er sjónvarpið stórt? Kynnistu fólki á Giggó? Ég var hálf gáttaður á spurningunum en ákvað að leggja ekki á. Mér fannst þessi spurning best:
Kynnistu fólki á Giggó?
Var maðurinn að ýja að því að ég væri að leita að elskuhuga á þessu appi?“
Glúmur segist hálfpartinn hafa hlegið „og spurði hvort þetta mál væri frétt. Blaðamaðurinn svaraði: Kannski. Sumsé Glúmur auglýsir eftir handlögnum manni á appi sem kallast Giggó og gæti nú sætt rannsókn sem glæpamaður.“
![](https://www.mannlif.is/wp-content/uploads/2022/11/Glumur-Baldvinsson.jpg)
Segir málið furðulegt og hann hlakkar til að lesa fréttina:
„Ég sem hélt að ritstjórn þessa furðumiðils sætti rannsókn fyrir að stela upplýsingum úr farsíma skipstjóra. En þeir snúa nú vörn í sókn og rannsaka mann sem þurfti að hengja upp gardínur. Kynnistu fólki á Giggó? Og er sjónvarpið stórt? Þetta lið er ekki með öllum mjalla. Hlakka til að lesa fréttina: Glúmur sækist eftir kynnum við fólk á Giggó!
Hversu einmana og yfirgefinn þyrfti ég að vera? Hvað verður það næst? Glúmur fór á Tinder?“