Borgin vill ræða við þau sem dvöldu á Vöggustofu Thorvaldsensfélagsins

Ráðuhús ReykjavíkurBorgin óskar eftir að ræða við þau sem dvöldu á vöggustofunni.

Mynd: Reykjavíkurborg

Björgvin Gunnarsson

Blaðamaður

Nefnd um starfsemi Vöggustofu Thorvaldsensfélagsins óskar eftir þeim sem vistuð voru þar á seinni hluta áttunda áratugarins, í viðtal um þau atvik sem þau muna eftir. Þetta kemur fram í fréttatilkynningu frá Reykjavíkurborg.

Nefnd um athugun á starfsemi Vöggustofu Thorvaldsensfélagsins 1974-1979 óskar vinsamlegast eftir því að þeir sem vistuð voru sem börn á þeirri vöggustofu, eða aðstandendur þeirra, og hafa áhuga á því, veiti nefndinni viðtal um þau atvik sem þau muna eftir.

Fram kemur einnig í fréttatilkynningunni að áður hefur verið fjallað um tímabilið fram að 1974 og að nú sé um að ræða nýja athugun, sem tekur til annars tímabils. aukreitis er tekið fram að þótt einstaklingar hafi áður mætt til viðtals við nefndina, myndi hún engu að síður gjarnan óska nýs viðtals, um það tímabil sem er nú undir athugun nefndarinnar.

Þá óskar nefndin einnig góðfúslega eftir því þau sem störfuðu á vöggustofunni á umræddu tímabili, og búa yfir upplýsingum sem geta varpað ljósi á þau atriði sem nefndinni bera að kanna, að hafa samband með sama hætti.

Þeir einstaklingar sem vilja segja frá reynslu sinni eru beðnir um að hafa samband við nefndina sem fyrst og eigi síðar en 15. apríl nk. á netfangið [email protected]

Nefndin starfar á grundvelli laga nr. 45/2022, um heimild Reykjavíkurborgar til að skipa nefnd til að kanna starfsemi vöggustofa.

Samkvæmt ákvörðunum borgarráðs nær yfirstandandi athugun nefndarinnar til Vöggustofu Thorvaldsensfélagsins tímabilið 1974-1979. Meginverkefni nefndarinnar er:

Að lýsa starfsemi Vöggustofu Thorvaldsensfélagsins, hlutverki hennar í barnaverndar og/eða uppeldismálum og tildrögum þess að börn voru vistuð þar á því tímabili sem um ræðir.
Að leitast við að staðreyna eins og kostur er hvort og þá í hvaða mæli börn sem vistuð voru á stofnuninni hafi sætt illri meðferð eða ofbeldi á meðan á dvölinni stóð.
Að lýsa því hvernig eftirliti Reykjavíkurborgar og ríkisins með vöggustofum var háttað.
Að lýsa öðrum atriðum sem tengjast starfsemi vöggustofunnar og nefndin telur þarfnast skoðunar, þar á meðal eins og kostur er afdrifum þeirra barna sem vistuð voru á vöggustofunni eftir að dvölinni lauk.