Forsetaritari hefur beðið fjölmiðla um að fjarlægja rangfærslur um sundferð Höllu Tómasdóttur forseta.

Í gær birti Eiríkur Jónsson fjölmiðlamaður frétt á vefsíðu sinni eirikurjonsson.is sem ljóstraði því að Halla Tómasdóttir forseti Íslands hafi sést með tvo lífverði í Álftaneslaug, sem væri nýlunda. Í kjölfarið höfðu nokkrir fjölmiðlar fréttina eftir Eiríki, sem áður hefur starfað sem ritstjóri Séð og heyrt, blaðamaður á DV og sjónvarpsmaður á Stöð 2.

Vísir.is hefur eftir forsetaembættinu að forsetinn hafi farið í sund með dóttur sinni, en ekki lífvörðum, og rætt við fólk í pottinum.

Þegar ljóst var hvernig væri í pottinn búið birti Eiríkur nýja grein þar sem hann bað Höllu Tómasdóttur afsökunar og fjarlægði upprunalegu fréttina af vefsíðunni sinni. „Fyrirgefðu forseti - leiðrétting,“ segir Eiríkur.