„Við höfum beðið í tvö ár eftir niðurstöðu. Við vissum þegar við mótmæltum, að við þyrftum að horfast í augu við afleiðingar en okkur grunaði ekki að þær myndu taka svona langan tíma,“ segir Elissa Bijou. Hún og Anahita Babaei voru ákærðar fyrir að hafa farið án leyfis um borð í Hval 8 og Hval 9 í þeim tilgangi að hindra hvalveiðar Hvals hf. Málið var þingfest í upphafi júní, en mótmælin áttu sér stað í september 2023. Konurnar eru í ítarlegu viðtali hjá Heimildinni en hér má sjá brot úr því.

Þær eru ákærðar fyrir þrjú brot, en segja ákærurnar úr hófi fram miðað við aðgerðir þeirra.

„Það kom okkur öllum á óvart, lögfræðistofunni, fólki sem við töluðum við í réttarsalnum og meira að segja þau sem styðja hvalveiðar eru hissa á því hversu miklu skattfé eigi að verja í málið okkar.“

Ákærurnar snúa að húsbroti, broti gegn lögum um siglingavernd og óhlýðni við fyrirmæli lögreglu.

Myndbandsupptökur glataðar af lögreglu

„Dómarinn var ekki sáttur með ákæruvaldið því að eftir tveggja ára rannsókn höfðu þau ekki einu sinni afritað myndefnið úr líkamsmyndavélum og myndefni úr líkamsmyndavélum sem við þurftum á að halda var hentuglega búið að týna,“ segir Elissa með kaldhæðni. „Þannig við höfum ekki einu sinni haft tíma til að búa til almennilega vörn sem er út í hött eftir tvö ár.“

Anahita bætir við: „Við lögfræðingurinn minn, virkilega reyndum að fara í gegnum möguleg mannréttindarbrot eða lögregluofbeldi sem var öllu vísað frá. Myndefnið sem gæti mögulega sannað ofbeldi hafði hentuglega verið eytt af lögreglunni. Þannig það er bara mál sem hefur verið þurrkað út sem ég og lögfræðingurinn minn vorum að vona að gæti farið lengra.“

Ennfremur segir Anahita: „Lögfræðingar okkar eru staðfastir á því að ákærurnar eru óhóflegar og að málið hefði átt að vera látið niður falla.“ Í september munu lögfræðingarnir mæta fyrir dóm og reyna að fá málið látið niður falla. Verði það ekki samþykkt fer aðalmeðferðin fram í janúar næstkomandi. „Við vitum það öll að þau eru að reyna að setja fordæmi þannig að málið okkar verður ekki látið falla niður og mun fara fyrir dómstóla,“ segir Anahita.

Elissa segir að þeim hafi verið boðið að samþykkja sektargerð til að forða því að málið færi lengra. „Eftir að við vorum handteknar var okkur sagt að við gætum látið þetta allt hverfa ef við myndum samþykkja ákærurnar og viðurkenna að við hefðum brotið lög og borga himinháa sekt. Mun hærri en önnur friðsöm mótmæli eða dýravinamótmæli sem íslenskir almennir borgarar hafa staðið fyrir.“ Þær neituðu að samþykkja. „Við höfum rétt til þess að mótmæla þegar allar aðrar leiðir hafa verið fullreyndar. Það skipti okkur máli að við hörfuðum ekki frá því.“