Andri Snær Magnason rithöfundur segir að að sé „ófært að eyðileggja Krýsuvík. Stórkostlega fallegt svæði og skammsýni að gjörnýta öll háhitasvæðin á höfuðborgarsvæðinu samtímis.“
Andri Snær vitnar síðan í færslu sem Ellert Grétarsson setti fram á Facebook, en þar talar Ellert um eyðileggingu í Krýsuvík:
„Hvað brýst um í kollinum á fólki sem telur það sniðuga hugmynd að gera fólkvang og vinsælt útivistarsvæði til margra áratuga að orkuvinnsluvæði?“ spyr Ellert og segir einnig að hann eigi „erfitt með að gera“ sér „það í hugarlund því að ég skil þetta ekki.“
Hann færir í tal að í Krýsuvík fari einfaldlega fram „eyðilegging á náttúruperlunni í Krýsuvík“ og segir að þessi meinta eyðilegging sé hafin og „í boði HS Orku og bæjaryfirvalda í Hafnarfirði.“
„HIð fagra Arnarvatn á Sveifluhálsi er forn gosgígur. Hér við bakka vatnsins er gert ráð fyrir einu borstæðinu“ segir Ellert.
Hann birtir nokkrar ljósmyndir þar sem má sjá „fyrsta borstæðið af þeim átta sem fyrirhugað er að gera á svæðinu. Já, hvorki meira né minna en átta borteigar! Þá eigum við eftir að tala um stöðvarhús virkjunarinnar, skiljuhúsin, allar gufulagnirnar þvers og kruss um svæðið, vegalagningu og önnur þau mannvirki sem fylgja virkjun af þessu tagi. Já, ég spyr: Hvað er þetta fólk eiginlega að hugsa sem tekur ákvörðun um slíka eyðileggingu?“
Spyr einnig hvort þetta sé „kannski bara enn eitt dæmið um yfirgengilega frekjuna, græðgina, virðingarleysið, sjálfhverfuna, skammsýnina, skeytingarleysið - jafnvel heimsku?“
Valdimar Víðisson bæjarstjóri Hafnarfjarðar.
Ellert segir að lokum að hann haldi „stundum að orkugeirinn á Íslandi sé svo vanþroska að þar á bæ þekki fólk ekki muninn á nýtingu og sóun. „Látum sem flesta vita hvaða myrkaverk er verið að fremja í Krýsuvík af HS Orku og bæjaryfirvöldum í Hafnarfirði.“
