Veðurstofa Íslands hefur breytt framsetningu sinni í hættumatskortum til að ná yfir ógnir sem ekki var áður varað við, eins og Mannlíf greindi frá í gær.

Í umfjöllun Mannlífs í gærmorgun kom fram að skilaboð og kort almannavarna og Veðurstofunnar næðu ekki til vinsælla ferðamannastaða þar sem nýjar gjár og sprungur hefðu verið að finnast eftir kvikuhlaupið 1. apríl. Það er nú breytt. Nýja kortið sýnir stöðuna nærri Reykjanestá, þar sem metin er hætta á jarðfalli ofan í sprungu, jarðskjálftum og sprunguhreyfingum.

„Nýleg þróun atburða á skaganum, þar sem kvikugangur myndaðist og náði í norðaustur hluta eldstöðvarkerfis Svartsengis þann 1. apríl 2025 og gosupptök urðu vestur af nyrsta hluta Fagradalsfjalls í ágúst 2024, undirstrikar þörf á hættumati fyrir stærra svæði,“ segir í umfjöllun Veðurstofunnar. „Því hefur nýtt kort verið þróað til að yfirstíga takmarkanir fyrra korts. Nýja kortið nýtist ekki eingöngu við hættumat á Reykjanesskaga heldur hefur verið þróuð aðferðafræði sem hægt er að beita á öll önnur virk eldstöðvakerfi á Íslandi.“

Maður lést í Grindavík 10. janúar í fyrra eftir fall ofan í sprungu í Grindavík og hafa fimm réttarstöðu sakbornings í málinu út frá aðbúnaði og öryggi á vinnustað.

Í umfjöllun Veðurstofunnar í dag kemur fram að landris sé tvöfalt hraðara en fyrir síðasta eldgos. Þá er fjallað um skjálftavirkni við kvikuganginn sem teygði sig til norðausturs í átt að Reykjanesbraut og norður fyrir Keili. „Áfram mælist nokkur smáskjálftavirkni í kringum kvikuganginn sem myndaðist 1. apríl og mælast tugir skjálfta á hverjum degi á svæðinu. Stærsti skjálftinn sem mældist síðustu viku var M3,3 að stærð þann 13. Apríl og var staðsettur yfir norðurhluta kvikugangsins um tæpa 4 km ANA við Keili. Langflestir skjálftanna eru undir M2 að stærð og á 2 til 6 km dýpi.“

Áfram er gert ráð fyrir eldgosum. „Á meðan að kvikusöfnun heldur áfram undir Svartsengi þarf að reikna með endurteknum kvikuhlaupum og jafnvel eldgosum á Sundhnúksgígaröðinni.“