Orkuveita Reykjavíkur hefur rutt sér leið í gegnum óraskað land á Mosfellsheiði norður af fjallinu Hengli til þess að koma upp 125 metra háu mastri fyrir vindmælingar. Náttúruverndarsinnar gagnrýna framkvæmdirnar, en þær eru aðeins byrjunin, því til stendur að reisa 15 vindmyllur, allt að 210 metra háar, sem sjást munu víða af höfuðborgarsvæðinu, eins og Mannlíf greindi frá.
Framkvæmdin var samþykkt af sveitarfélaginu Ölfusi, þótt framkvæmdasvæðið sé mun nær Reykjavík og Mosfellsbæ heldur en Þorlákshöfn.
Páll Ásgeir Ásgeirsson, náttúruverndarsinni, ferðafrömuður og höfundur margra bóka um náttúruferðir, gagnrýndi jarðraskið í dag, rétt eins og eiginkona hans, Rósa Sigrún Jónsdóttir, fararstjóri hjá Ferðafélagi Íslands.
„Svona gengur Orkuveitan um landið á Mosfellsheiði,“ segir Páll Ásgeir. „Þarna mun rísa 120 metra hátt „rannsóknarmastur“ vegna áhuga OR á að reisa vindorkuver skammt frá Dyravegi undir Henglinum,“ segir hann og bætir við. „Framkvæmdaleyfi rann í gegnum sveitarstjórn Ölfus án athugasemda um úttektir eða rannsóknir áður en hafist yrði handa.“
Ölfus veitti framkvæmdaleyfi
Orkuveitan sótti um framkvæmdaleyfi til sveitarfélagsins Ölfuss í fyrrasumar. Í fundargerð skipulags- og umhverfisnefndar Ölfuss kemur fram að eins kílómetra langur vegaslóði sé ruddur.
„OR sækja um framkvæmdaleyfi vegna framkvæmda og reisingar vindmælingamasturs á sunnanverðri Mosfellsheiði um 1 km sunnan Nesjavallavega, auk aðkomuslóða frá Nesjavallavegi. Mastrið verður 125m hátt og mun að hámarki standa í 2 ár meðan vindmælingar standa yfir,“ segir í fundargerðinni.
Skipulags- og umhverfisnefnd sveitarfélagsins samþykkti að veita framkvæmdaleyfið.
Ósáttir náttúruverndarsinnar
Um 40 manna hópur á vegum Landverndar gekk um svæðið í gær. Frömuðir í ferðamennsku og náttúruvernd gagnrýna framkvæmdina harðlega undir færslu Páls Ásgeirs.
„Já, nú er svæðið náttúrulega ekki óraskað,“ segir Teitur Þorkellsson og bætir við: „„Framfaralestin“ brunar.“
Pálmi Gestsson, leikari og Spaugstofumaður, blótar framkvæmdinni. „Helv…fokking fokk, þetta er í bakgarðinum hjá mér. Allt að 210 metra háar, eins háar og þrír Hallgrímskirkjuturnar hver ofan á öðrum. Þessi andsk.. sæist vestur á firði!“
„Þetta er skelfileg framkoma,“ segir Hinrik Ólafsson leikari og leiðsögumaður. „Svei þeim sem stunda svona verknað.“
Steyptur grunnur 30 metrar í þvermál
Orkuveitan lýsti áformum sínum í matsáætlun í mars síðastliðnum. Þar kemur fram að gert sé ráð fyrir steyptum undirstöðum sem við hverja vindmyllu sem ná að hámarki 30 metrum í þvermál og 2 til 3 metrum að dýpt. Lengd spaða verður að hámarki 87,5 metrar. Orkan sem fæst næði allt að 108 megawöttum. Það er rúmlega einn þriðji af orkuframleiðslu Hellisheiðarvirkjunar, sem sést frá Hellisheiði, og rétt tæplega jafnmikil orkuframleiðsla og frá Nesjavallavirkjun, sem er austan megin Dyrfjalla frá áformuðu vindorkuveri.
Forsendur Orkuveitunnar fyrir staðarvali voru eftirfarandi: Að „vera í nálægð við þegar röskuð svæði, vera í nálægð við dreifikerfið og starfssvæði Orkuveitunnar, lágmarka áhrif á umhverfi, náttúru og dýralíf og lágmarka sjónræn áhrif við mikilvæg náttúru, ferðamanna- og útivistarsvæði.“
