Orkuveitan vill fara í tilraunamælingar fyrir nýjum vindmyllum í Leitahrauni skammt frá Þrengslavegi, en hefur nú verið synjað um framkvæmdaleyfi.

Í beiðni Orkuveitunnar til Sveitarfélagsins Ölfuss var farið fram á „framkvæmdaleyfi hjá sveitarfélaginu Ölfusi vegna framkvæmda við vindmælimastur og vegslóða í Leitarhrauni um 1,3 km norðan Litla-Sandfells“. Til stóð að hefja framkvæmdirnar næsta haust.

Skipulags- og umhverfisnefnd Ölfuss var hins vegar ósammála Orkuveitunni og setur henni stólinn fyrir dyrnar.

„Skipulag á svæðinu heimilar ekki vindorkugarð. Nefndin sér ekki fyrir sér breytingar þar á, á gildistíma aðalskipulags og telur vindrannsóknir á svæðinu því óþarfar."

Skipulagsstofnun komst að þeirri niðurstöðu 5. mars síðastliðinn að framkvæmdin sé ekki umhverfismatsskyld.

Á dögunum byrjaði Orkuveitan framkvæmdum við vindmælingar annars staðar í sveitarfélaginu, nærri Dyravegi milli fjallsins Hengils og Nesjavallavegar. Þeim framkvæmdum hafa náttúruverndarsinnar mótmælt, en á næstunni mun þar rísa 125 metra hátt mastur fyrir vindmælingar. Er það gert í aðdraganda fyrirtáætlana Orkuveitunnar um að reisa þar 15 vindmyllur, allt að 210 metra háar, sem sjást munu víða að frá höfuðborgarsvæðinu.