Lögregla og björgunaraðilar leita nú að manni sem óttast er að hafi farist í hákarlaárás við Hadera-ströndina í norðvesturhluta Ísraels. Atvikið átti sér stað fyrir framan fjölda áhorfenda, sem sáu manninn berjast í sjónum áður en sjórinn varð skyndilega rauður.

„Við fengum tilkynningu um að sundmaður hefði orðið fyrir árás hákarls,“ sagði talsmaður neyðarþjónustunnar Magen David Adom. „Við höfum ekki enn fundið manninn, en leit stendur yfir með þyrlum og vatnaskútum.“

Hákarllinn sást fyrst nálægt fólki í grunnsævi, og sumir hlupu í land í skelfingu. Samkvæmt vitnum sást hákarl ráðast á manninn við Orot Rabin-orkuverið, þar sem sjórinn litaðist rauður og ekkert var hægt að gera til aðstoðar.

Ziv Demeter, björgunarsérfræðingur hjá Magnus-leitarþjónustunni, sagði við Channel 12: „Ef maðurinn var ekki í kafarabúningi, getur lík hans hafa skolast burt og þá getur leit tekið marga klukkutíma eða jafnvel daga.“

Sjávarlíffræðingurinn Dr. Adi Barash, sem stýrir verkefninu Hákarlar í Ísrael, sagði í viðtali við Ynet:

„Aðstæður í sjónum voru óheppilegar til sunds, en fjöldi fólks safnaðist samt saman kringum hákarlana. Það er ábyrgðarlaust og getur leitt til árása.“

Barash sagði jafnframt að ítrekað hafi sést til fólks toga í sporða hákarla og jafnvel fara út í sjó með börn til að „leika“ sér með dýrin.

Umhverfisstofnun Ísraels ítrekar nú fyrri viðvaranir:

„Við biðjum almenning að forðast að nálgast hákarla. Þeir eru vernduð dýr og geta brugðist ófyrirsjáanlega við.“

Hákarlar eru algengir á svæðinu frá nóvember til maí, en eru sjaldan árásargjarnir. Undanfarið hefur þeim þó fjölgað við strendur Hadera og Beit Yanai, meðal annars vegna hlýnunar sjávar og dauðra fiska sem skolað hefur á land.

Ströndinni hefur nú verið lokað og almenningi ráðlagt að halda sig fjarri sjónum.

Hér fyrir neðan má sjá myndskeið af hákarlaárásinni en viðkvæmir eru varaðir við áhorf.