Raforkukostnaður heimila hefur hækkað á síðustu árum en þó umtalsvert meira hjá fyrirtækjum.
Markmiðið með væntanlegum úrbótum er það að auka gagnsæi og bæta samkeppnishæfni atvinnulífs, tryggja hagkvæmari notkun raforku, en þetta kom fram á blaðamannafundi Jóhanns Páls Jóhannssonar, umhverfis-, orku- og loftlagsráðherra, ásamt raforkueftirlitinu.
Í lok janúar síðastliðnum óskaði umhverfis-, orku- og loftslagsráðuneytið eftir greinargerð um þróun raforkukostnaðar á Íslandi, áhrifum á neytendur sem og atvinnulífið hér á landi.
Kemur fram að það hafi ekki síst verið vegna háværrar umræðu um þróun raforkuverðs á Íslandi.
Hanna Björg Konráðsdóttir, sviðsstjóri Raforkueftirlitsins, segir að samkvæmt skýrslunni, hafi raforkukostnaður heimila hækkað um 11 prósent frá árinu 2020, á föstu verðlagi.
Meðal þess sem lagt er til í skýrslunni er að bæta gagnaöflun og greiningar á raforkuverði og einfalda skýrslugjöf fyrirtækja í greininni; efla eftirlit með raforkunotkun stórnotenda. Einnig er kallað eftir því að hátternisreglur og viðurlög verði skýrari; að upplýsingagjöf um raforkuöryggi verði reglubundin.
Þá er lagt til að fram fari skilvirknigreining á sérleyfisfyrirtækjum sem annast flutning og dreifingu raforku og einnig er lagt til aukinnar eftirfylgni á innleiðingu snjallmæla hjá dreifiveitum. Samkvæmt skýrslunni hefur dreifikostnaður heimila hækkað um 14% á föstu verðlagi frá árinu 2020.
Mun nú áhersla vera lögð á aukna gagnabirtingu í þeim tilgangi að efla umræðu er varðar þróun raforkukostnaðar, styðja við ákvarðanatöku stjórnvalda og fyrirtækja.
Lagðar eru til mögulegar umbætur á raforkulögum er snúa að því að yfirfara ákvæði raforkulaga sem og reglugerðar um undanþágur í gjaldskrám dreifiveitna.
