Í dagbók lögreglu frá því í nótt er greint frá því að nokkrir ökumenn hafi verið stöðvaðir fyrir að keyra of hratt. Einn af þeim var að keyra á 121 kílómetra hraða þar sem hámarkshraði er 60.

Tilkynnt var um mjög ölvaðan mann sem var að áreita fólk við verslun. Ekki var unnt að ræða við manninn eða koma honum heim sökum ástands og var hann því handtekinn. Við handtökuna fundust á manninum meint fíkniefni og var hann vistaður í fangaklefa vegna ástands.

Ökumaður var stöðvaður grunaður um akstur undir áhrifum fíkniefna. Hann var einnig með hníf meðferðis og auk þess reyndist hann sviptur ökuréttindum.

Þá var tilkynnt um tvo aðila að stela í verslun í miðbænum. Þegar starfsmenn höfðu afskipti af þeim réðust aðilarnir á starfsmennina og höfðu í hótunum við þá. Annar aðilinn enn á vettvangi þegar lögregla kom og var sá handtekinn og fluttur á lögreglustöð.

Í dagbókinni var greint frá því að þrír hafi gist fangageymslu og 70 mál hafi verið bókuð.