Eyrún Björk Jóhannsdóttir gerði sér lítið fyrir og safnaði rétt rúmri milljón krónum þegar hún hljóp Bakgarðshlaupið á dögunum. Hljóp hún hvorki meira né minna en 67 kílómetra.

Að sögn Eyrúnar Bjarkar, flugfreyju og aðgerðarsinna, hefur sú upphæð sem safnaðist til stuðnings fjölskyldum á Gaza, nú verið komið í hendurnar á 30 fjölskyldum. Eyrún sagði frá þessu á Facebook en hún segir að allar fjölskyldurnar 30, séu fjölskyldur sem búið er að staðfesta að búi við hörmulegar aðstæður.

„Þessir peningar nýttust þessum fjölskyldum vel og eru jafnvel enn að nýtast. Sumir eru í betri aðstöðu en aðrir, aðrir hafa neyðst til að yfirgefa tjöld sín enn einu sinni og fara út í óvissuna með ekkert á bakinu, til að bjarga börnunum sínum. Allir eru enn í sárri neyð og þurfa enn okkar stuðning.“

Í samtali við Mannlíf segist Eyrún Björk að henni hefði ekki dottið í hug að hún gæti safnað svona hárri upphæð en sé þó ekki hissa á því hversu margir vildu styrkja. „Ég var mjög hissa hvað ég náði að safna miklu og mjög þakklát. Ég get eiginlega ekki lýst því hversu þakklát ég er.“

En hvað fékk Eyrúni Björk til þess að byrja söfnunina?

„Ég hef núna verið nokkuð lengi að reyna að gera hvað ég get gert [í sambandi við árásir Ísraela á Gaza], en hver og einn getur bara gert lítið. Ég vildi bara gera það sem ég gæti til að hjálpa þessu fólki við þessar hörmulegu aðstæður. En já, ég er hissa en samt ekki hissa á stuðningnum því ég veit að það er fullt af fólki sem vill hjálpa og finnst þetta auðvitað alveg ömurlegt og vill gera eitthvað en kemur því ekki við í sínu daglega lífi. Og veit í raun ekki hvert það eigi að snúa sér.“

Eyrún Björk segir að fólki finnist mörgum erfitt að bera sig að ef það vill styðja Gaza-búa beint enda getur það verið nokkuð flókið og svo hafa svikahrappar einnig nýtt sér ástandið.

„Þess vegna hef ég verið að deila á Facebook-síðunni minni hvaða fjáröflunarsíðum fólk getur treyst alveg pottþétt því ég veit að fólk er að fá vinabeiðnir frá fólki en venjulegt fólk hefur ekki burði til að kanna bakgrunn þeirra,“ segir Eyrún Björk og bæti því við að það séu þó nokkrir einstaklingar, til dæmis á Akureyri og í Reykjavík, sem hafa verið að ræða við fólk í neyð á Gaza í gegnum myndbandssímtöl, til þess að fá staðfestingu á raunverulegri neyð.