Þýsk yfirvöld greindu frá því í dag að þau hefðu handtekið 22 ára gamlan sýrlenskan mann í Berlín sem er grunaður um að hafa undirbúið árás í nafni íslam, án þess þó að gefa upp nánari upplýsingar um meinta áætlun.

Grunaði maðurinn, sem var handtekinn í gær í Neukoelln-hverfi í suðurhluta höfuðborgarinnar, kom fyrir dómara í dag og var úrskurðaður í gæsluvarðhald.

Hann er grunaður um að hafa „undirbúið alvarlegt ofbeldisverk gegn þýska ríkinu“ auk þess að hafa „dreift áróðursefni stjórnarskrárandstæðra og hryðjuverkasamtaka,“ samkvæmt sameiginlegri yfirlýsingu lögreglu og saksóknara í Berlín.

Hann er sagður hafa skipulagt árás í nafni íslam, sagði talsmaður saksóknaraembættisins í Berlín við AFP fyrr um daginn.

Dagblaðið Bild greindi frá því að við leit sérsveitarlögreglu á þremur heimilisföngum í Berlín, sem tengdust hinum grunaða, hefðu fundist efni sem mætti nota til að búa til sprengiefni.

Blaðið sagði að talið væri að hin meinta áætlun hefði beinst að Berlín, en að engar frekari upplýsingar hafa komið fram enn sem komið er.

Innanríkisráðherrann Alexander Dobrindt sagði í yfirlýsingu að handtaka Sýrlendingsins sýndi að „hryðjuverkaógnin í Þýskalandi, þó hún sé oft óljós, sé enn há.“

Hann sagði að Sýrlendingurinn hefði verið í Þýskalandi síðan árið 2023 og að starfsemi hans benti til undirbúnings árásar.