Helga Vala Helgadóttir, fyrrverandi oddviti Samfylkingar í Reykjavík, er harðorð í garð Kristrúnar Frostadóttur, formanns Samfylkingar og annnarra þingmanna flokksins, vegna hjásetu flokksins í útlendingamálinu á Alþingi.
Helga Vala brást við þegar Þorbjörg Þorvaldsdóttir bæjarfulltrúi Samfylkingar í Garðabæ sagði sig úr flokknum. „Þetta er svo óendanlega ömurlegt bara, ég skil alls ekki neitt. Hvernig sér forysta Samfylkingarinnar fyrir sér að miðla málum í ríkisstjórn þegar öll grundvallarmálin eru fokin áður en í kosningarnar er komið?“ spyr Helga Vala og efast um að flokkurinn standi lengur fyrir mannúð, jöfnuði og samkennd með fólki í viðkvæmri stöðu.
Helga Vala sagði á sínum tíma af sér þingmennsku. Hún sagði fyrst frá ákvörðun sinni um afsögn í viðtali við Morgunblaðið en lét formann sinn vita skömmu áður en viðtalið birtist. Fáum sem til þekkja duldist að afsögnin var tilkomin vegna innbyrðis deilna hennar við nýjan formann, þótt hún hafi þrætt fyrir það. Nærtækt er að álykta sem svo að nú telji Helga Vala sinn tíma vera kominn og þess vegna mundi hún refsivöndinn gegn fyrrverandi samherjum.