Samstöðuhópur afhenti bæjarstjóra Akureyrar undirskriftarsöfnun þar sem skorað er á bæjarstjórn að hætta viðskiptum við fjármálatæknifyrirtækið Rapyd.
Þriðjudagsmorguninn 24. september fór hópur einstaklinga sem tilheyra óformlega samstöðuhópnum „Samstaða með Palestínu – Akureyri“ á fund við bæjarstjóra Akureyrar, Ásthildi Sturludóttur. Tilefnið var að afhenda henni undirskriftalista sem einn úr hópnum, Guðjón Magnússon, hafði staðið fyrir í sumar inn á Ísland.is. Undirskriftarlistinn er ákall til Akureyrarbæjar að hætta með fjármálatæknifyrirtækið Rapyd sem færsluhirði bæjarins. Undir það skrifuðu alls 1.039 einstaklingar. Fjöldi ástæðna er fyrir því að eiga ekki í viðskiptum við Rapyd og má lesa um þær hér: https://snidganga.is/vorumerkin/#rapyd
Í tilefni af afhendingunni á undirskrifalistanum sagði Guðjón nokkur orð.
„Frú bæjarstjóri.
Þakka þér fyrir að gefa mér (og okkur í hópnum) þetta tækifæri til að opna umræðuna um málefni sem ég hef trú á að skipti æ meira máli í samfélaginu okkar sem og í alþjóðasamfélaginu öllu.
Í dag vil ég vekja athygli á og hefja samtal um sniðgöngu á Rapyd, fjármálatæknifyrirtæki sem, þrátt fyrir alþjóðalega starfsemi, hefur sætt gagnrýni og spurningum varðandi siðferðileg álitamál í viðskiptaháttum sínum og starfsemi. Ítök Rapyd á staðbundinn efnahag, meðal annars okkar hér á Akureyri, hefur vakið upp spurningar varðandi gegnsæi, ábyrgð fyrirtækja og sanngirni í fjármálaviðskiptum. Þótt að fjármálatæknifyrirtæki eins og Rapyd spili stórt hlutverk í að einfalda færslur og veiti þægindi, þá verðum við að skoða það hvort starfsemi þeirra samræmist þeim gildum sem við viljum halda í heiðri.
Í leit okkar að sjálfbærni, sanngirni og fjárhagslegu réttlæti þá eigum við að íhuga það að sniðganga fyrirtæki sem fara ekki eftir þessum gildum. Frásagnir hafa komið upp á yfirborðið sem að tengja Rapyd við vafasama viðskiptahætti, þeirra á meðal hafa vaknað uppi spurningar um friðhelgi notenda, skort á gagnsæi í gjaldtöku og vafasöm viðskiptatengsl, sér í lagi við Ísraelsher og yfirstandandi árásir þeirra og þjóðarmorðs á íbúum Palestínu. En þess ber að geta að nú er til umræðu á Alþingi þingályktunartillaga þess efnis að Alþingi feli ríkisstjórn Íslands að beita sér fyrir alþjóðlegum viðskiptaþvingunum gagnvart Ísrael vegna þjóðarmorðsins í Palestínu. Í ályktuninni segir einnig að ríkjum heims beri að setja viðskiptaþvinganir gegn fyrirtækjum og einstaklingum sem hagnast á hernáminu og þeim sem taka þátt í því.
Í vegferð okkar að því að Akureyri verði áfram samfélag sem leggur áherslu á siðferðislega viðskiptahætti, þá er nauðsynlegt að við styðjum við fyrirtæki sem endurspegla gildi okkar um sjálfbærni, sanngirni og fjárhagslegt réttlæti. Sniðganga á Rapyd sendir sterk skilaboð að við sem bæjarfélag leggjum meiri áherslu á heilindi en þægindi. Það hvetur fyrirtæki til að starfa á þann veg sem styður við réttindi og hag neytanda og stendur með þeim gildum sem við sem samfélag leggjum áherslu á.
Ég hvet þig, frú bæjarstjóri, og bæjarstjórnina, til að hefja umræður um þetta mál. Stöndum saman í að styðja við sanngjarnan og gagnsæan staðbundinn efnahag þar sem við getum með stolti sagt að við styðjum við fyrirtæki sem fjárfesta í velsæld samfélags okkar. Við þökkum fyrir áheyrnina og umhugsunina.“
Frú bæjarstjóri tók við listanum og sagðist myndi leggja hann fyrir bæjarstjórn. Það er ósk hópsins og vonar hann að það muni gerast sem fyrst.