Feðginin Guðmundur Ágúst Brynjólfsson og Hildur Guðmundsdóttir verða jarðsungin saman frá Fríkirkjunni í dag. Þau létust með mánaðar millibili síðastliðið haust, hann á heimili sínu í Reykjanesbæ og hún á Flórída.
Guðmundur fæddist í Hafnarfirði 18. júlí 1935 og eignaðist hann þrjú börn, Hildur var elst þeirra systkina. Guðmundur var lærður vélvirki og vann lengi hjá Íslenskum aðalverktökum á Keflavíkurflugvelli og hjá varnarliðinu.
Guðmundur var virkur í sveitarstjórnarmálum í Hafnahreppi og var í hreppsnefnd frá 1974 til 1994 og oddviti frá 1982 til 1986. Eins var hann í björgunarsveitinni Eldey og var formaður hennar í nokkur ár.
Hildur Guðmundsdóttir fæddist í Reykjavík 1. október 1958. Hún eignaðist eina dóttur. Hildur útskrifaðist með viðskiptapróf frá Fjölbrautaskóla Suðurnesja og var á tímabili verktaki hjá Varnarliðinu á Keflavíkurflugvelli. Hún var líka lærð saumakona.
Hildur fluttist til Bandaríkjanna 1994 og bjó meðal annars í Tennessee, Monterey í Kaliforníu, Road Island, Washington DC og Flórída, sem var hennar uppáhaldsstaður og bjó hún þar þangað til hún lést.
Mágkona Guðmundar og frænka Hildar minnist þeirra með hlýjum orðum í minningargrein í Morgunblaðinu. „Mig langar til að minnast mágs míns Guðmundar og Hildar dóttur hans og frænku minnar í nokkrum orðum. Gummi var mikill töffari með dökkt liðað hár og Presleygreiðslu. Svo fæddist fyrsta barn þeirra, dóttirin Hildur, 1958. Það er mér ógleymanleg stund þegar þau komu heim í Skeifu beint af spítalanum, ég stóð við vögguna, sjö ára gömul og horfði á litla barnið með mikla svarta hárið. Hann tók fallegar myndir og framkallaði sjálfur, bæði af sínum börnum og fleirum í fjölskyldunni. Hildur var kraftmikil og vinnusöm við hvaðeina sem hún tók sér fyrir hendur. Guð blessi minningu þeirra.“
Útför Guðmundar og Hildar fer fram frá Fríkirkjunni í Hafnarfirði í dag klukkan 15. Mannlíf vottar aðstandendum samúð.