Töluvert vatn hafði borist um tvær hæðir Borgarholtsskóla í Grafarvogi í gær út frá vatnsúðarakerfi skólans, þegar slökkvilið höfuðborgarsvæðisins kom þangað í útkall í gærkvöldi.
Í ljós kom að eldur hafði kviknað í ofni í hannyrðastofu og sett úðarakerfi skólans í gang, sem slökkti eldinn. Sömuleiðis var brunaviðvörunarkerfi skólans í gangi.
Slökkvilið var tæpar tvær klukkustundir að hreinsa húsnæðið af vatni og reykjarslæðu.
Í tilkynningu frá slökkviliðinu á höfuðborgarsvæðinu kemur einnig fram að farið hafi verið í fjögur útköll á dælubílum síðasta sólarhringinn og 82 sjúkraflutninga.
Slökkviliðið tekur fram að Covid-faraldrinum sé ekki lokið, en 11 flutningum tengdum sjúkdómnum var sinnt í gær.
Tilkynningunni fylgir ný mynd frá æfingu og þjálfun slökkviliðsins, „sem við reynum að gera sem mest af svo við séum klárir í öll verkefni,“ segir í tilkynningu slökkviliðsins.
