Brynjar Níelsson er byrjaður að mæta aftur í ræktina eins og frægt er orðið. Í nýrri færslu á Facebook segir hann frá nýjustu vendingunum í líkamsræktarátaki sínu.
„Þetta líkamsræktarátak mitt hefur ekki gengið þrautalaust fyrir sig. Ég hef verið að reyna að læra á öll þessi hættulegu tæki, sem er ekki einfalt. Það fer því ekki vel í mig í viðkvæmum aðstæðum þegar sterkir strákar taka upp því skella mörg hundruð kílóa lóðum í gólfið si svona og öskra jafnvel fyrirvaralaust. Það hefur slegið mig svo út af laginu að ég hef þyngst um hálft kíló eftir hverja ferð í ræktina.“
Segir Brynjar einnig í færslunni sem er bráðfyndin, að hann hafi engan áhuga á að upplýsa þjóðina hvað hann taki mikið í bekk.
„Hef oft verið spurður að því hvað ég taki í bekk. Kraftatröllin í ræktinni settu mig á bekkinn. Mér leið vel þar enda vanur á vera á bekknum. Ég hyggst ekki upplýsa þjóðina um hvað ég tek í bekk en get sagt að stöngin ein sér er mjög þung.“
Endar hann færsluna á að segja frá raunum sínum í sturtuklefanum.
„Þetta var nú allt smá mál miðað við hremmingarnar þegar ég stóð allsber í sturtunni eftir allt erfiðið. Baðvörðurinn vatt sér að mér reiðilegur á svip og sagði mér að hypja mig umsvifalaust. Ég reyndi að malda í móinn en hann sagði að þeir sem væru með svona brjóst og ekki typpi svo séð verði ættu að vera í kvennaklefanum. Nú skil ég betur þá sem eru að berjast fyrir kynlausu búningsklefunum.“
Sjá einnig: Nú mega vinirnir vara sig, Brynjar er mættur í ræktina: „Þurfti iðulega að létta lóðin umtalsvert“