Fréttamiðillinn hestafrettir.is hafa birt áhugaverða grein sem ber yfirskriftina Nú þurfa stjórnarmenn fyrri tíma að svara ! þar sem kemur meðal annars fram að „í samtali við blaðamann hestafrétta segir Jóhann R. Skúlason að stjórnarmenn LH og Landsliðsnefnd höfðu vitað að báðum málum sem sér um að honum varðandi meint ofbeldi! Og nú þykist engin vita neitt?“
Eins og alþjóð veit þá var Jóhann Rúnar Skúlason rekinn úr landsliði hestamanna síðastliðinn sunnudag, en hann hefur keppt fyrir hönd Íslands í hestaíþróttum í áratugi.
Mannlíf greindi frá voðaverkum Jóhanns Rúnars og brottreksturinn úr landsliðinu kom í kjölfarið af fréttum Mannlífs um tvo dóma sem Jóhann hlaut; annars vegar árið 1994 fyrir kynferðisbrot gegn 13 ára barni, og hins vegar vegna heimilisofbeldis í Danmörku fyrir fimm árum, en þar í landi hefur Jóhann Rúnar búið um langt árabil.
Hestafrettir.is segja enn fremur í áðurnefndri grein að Jóhann Rúnar – í samtali við RÚV – „staðfestir að ákveðinn hópur innan stjórnar LH og forsvarsmenn landsliðsins hafi vitað af dómnum í mörg ár. Jóhann segist einnig undrast orð Guðna við Morgunblaðið vegna þess að dómurinn sé löngu fallinn.“
Vefmiðillinn segir einnig að „í þessari sömu frétt kemur fram að Sigurbjörn Bárðarson, landsliðseinvaldur, hafi vitað óljóst af þessu máli þegar það kom upp en tíðarandinn hafi verið allt annar en nú og málið lítið rætt. Í samtali Eiðfaxa staðfestir Jóhann að hafa átt samtal við Sigurbjörn núna í haust um að Sigurbjörn hefði ráðfært sig við lögfræðinga áður en hann valdi Jóhann í landsliðið 2019.“
Svo virðist sem forkólfar Hestafrétta séu ekki ánægðir með að Jóhann Rúnar hafi verið rekinn úr landsliðinu, og fljótlega eftir þá niðurstöðu setti vefurinn fram könnun þar sem fólk er spurt hvort:
Á Stjórn LH og Landsliðsnefnd að segja af sér?
Í kvöld höfðu 71% svarenda (samtals 251 einstaklingur) svarað neitandi, 21% svarenda (samtals 74 einstaklingar) sagt já, en 8% svarenda höfðu ekki skoðun á málinu (samtals 27 einstaklingar).
Langflestir lesendur Hestafrétta, eða þeir sem tóku þátt í könnuninni, virðast samkvæmt þessari könnun alls ekki ósáttir með brottvikningu Jóhanns Rúnars úr landsliðinu vegna kynferðisofbeldis gegn barni og heimilisofbeldis.