Þórólfur óttast hraða útbreiðslu: „Allt snýst þetta um hvernig fólk hegðar sér og hvað fólk gerir“

Í gær greindust 90 smit, en vanalega eru talsvert færri sýni tekin um helgar, og því líklegt að smitin verði fleiri.

Eins og staðan er í dag varðandi Covid 19 á Íslandi eru tæplega 2.500 manns í sóttkví; fjölgaði um 700 frá því á föstudag.

„Við vitum það að um það bil tíu prósent af þeim sem eru í sóttkví eiga eftir að greinast jákvæðir, þannig hefur það verið, þannig að við getum búist við því að fá einhverja hundruði manna sem eru jákvæðir úr sóttkví,“ segir sóttvarnarlæknir og bætir við:

„Þeir sem eru að greinast í sóttkví núna eru kannski í kringum fjörutíu prósent, þannig að það sýnir að smitið er mjög dreift og er víða.“

Þórólfur er harður á því að harðar aðgerðir skili meiri árangri:

„Við höfum áður verið að grípa til harðari aðgerða og séð árangurinn af því. En allt snýst þetta um hvernig fólk hegðar sér sjálft, hvað fólk gerir.“