Illugi Jökulsson, rithöfundur og fjölmiðlamaður með meiru, skrifaði færslu á Facebook í gær sem vakti lukku.
Lýsir Illugi spjalli fjögurra karla á ýmsum aldri þar sem Eflingarmálið bar á góma. Sögðust þeir hafa séð viðtölin við bæði Guðmund Baldursson og Sólveigu Önnu og voru þeir sammála um hvort hefði komið betur út.
„Uppúr pottinum barst digur karlarómur. Þar sátu fjórir stútungskallar á ýmsum aldri sem bersýnilega komu úr ýmsum áttum og höfðu ýmsar skoðanir á ýmsum málum. Svo fóru þeir að ræða Eflingarmál sem þeir höfðu greinilega allir lagt sig fram um að fylgjast með, til dæmis bæði horft á viðtöl við Guðmund Baldursson og svo Sólveigu Önnu í gær. Ég bjóst við að að minnsta kosti sumir þeirra myndu finna til samstöðu með Guðmundi Baldurssyni, en niðurstaðan var skýr: Ef þetta hefði verið fótboltaleikur hefði staðan verið 4-0 fyrir Sólveigu Önnu. Svo bættist kona í pottinn og þá varð staðan 5-0.“
Alls hafa 277 líkað við færslu Illuga, þegar þetta er ritað og þó nokkrir skrifað athugasemd við hana. Þar á meðal er rithöfundurinn Þórunn Jarla Valdimarsdóttir sem kemur með skondna línu. „Við sem heima liggjum þökkum pott slúðrið.“