Sigríður nokkur er alls ekki sátt með heimsendingarþjónustu Nettó og er orðin langþreytt á því að fá ónýtar vörur sendar heim. Vegna aðstæðna finnst henni óþolandi að þurfa að sætta sig við útrunnar, myglaðar, skemmdar eða rangar vörur á okurverði.
Sigríður vekur máls á óánægju sinni inni í fjölmennum hópi matgæðinga á Facebook, Matartips!. Þar lýsir hún reynslu sinni með eftirfarandi hætti:
„Ég er svolítið fúl núna. Var að fá heimsendingu frá Nettó og brauðið sem ég fékk sent er myglað. Greinilega mikið í gangi inni í umbúðunum enda útþandar. Mikið er ég orðin þreytt á að fá sent ónýta vöru í heimsendingarþjónustu. Útrunnið, myglað, skemmt, röng vara á okurverði sem ég verð að sætta mig við vegna aðstæðna,“ segir Sigríður hundfúl.
„Og það eru allar heimsendingarþjónusturnar eins með þetta þótt sumar sé aðeins skárri eða verri. Það fer orðið mikill tími í kvartanir. Og þótt maður fái stundum endurgreiðslu þá bætir það ekki fyrir óþægindin.“
Flestir þeirra matgæðinga sem tjá sig undir færslu Sigríðar lýsa furðu sinni yfir þjónustunni. Einhverjir þeirra telja betri vörur að fá annars staðar á meðan aðrir hafa slæma reynslu af flestum heimsendingarþjónustunum.
„Ég gafst upp á Nettó! Finnst Heimkaup skást,“ segir Karen. Rebekka er á svipuðum nótum. „Heimkaup er best þegar kemur að ferskri vöru og heimsendingu. Þjónustan er líka alveg merkilega góð ef eitthvað er. Ég gafst upp á Nettó eftir þrjú skipti, komu alltaf mörgum tímum seinna en þær ætluðu og það vantaði àvallt margar vörur eða þær ónýtar. Nenni ekki Krónuappinu því það eru alltaf 2-3 dagar í bið eftir sendingu og mun minna úrval í appinu en verslun,“ segir Rebekka.
Sæþór veltir fyrir sér hvers vegna þetta er að gerast. „Ég hugsa að sé mikið um ad búðirnar noti tækifæri og losi sig við eldri stimpla í heimsendingu um, segir Sæþór. Og undir það tekur Dísa af reynslu. „Það er einmitt staðreynd sem ég get staðfest, hef bæði unnið og þekki fólk sem vinnur i búðum sem hafa þurft að taka til heimsendingar,“ fullyrðir Dísa.
Helgi vill hreinlega ekki láta einhvern velja vörurna fyrir sig. „Þetta er ástæða þess að ég myndi ALDREI nota þessa þjónustu , ég vil velja minn mat sjálfur , það segir sig alveg sjalft að sá/ sú sem mokar í körfu fyrir annan en sjálfan sig er sama um vörurnar,“ segir Helgi.
Nettó brást við fréttinni en hér má sjá frétt um það: Nettó bregst við gagnrýni: „Búið er að hafa samband við konuna“