Forseti Rússlands, Vladimir Putin, sótti heim sýningu Ragnars Kjartanssonar, Santa Barbara – A living Sculpture sem sýnd er í nýrri menningarmiðstöð í höfuðborg Rússlands, Moskvu, í dag.
Samkvæmt Facebooksíðu sendiráðs Íslands í Moskvu verður formleg opnun sýningarinnar á morgun. Sýningin er partur af hópsýniningu Ragnars og annarra íslenskra listamanna sem ber heitið To Moscow! To Moscow! To Moscow!.
Sendiherra Íslands í Rússlandi, Árni Þór Sigurðsson, bauð aðstandendum og nokkrum gestum í sendiráð sitt í Moskvu í tilefni af sýningunni. Meðal gesta voru höfundar bandarísku sápuóperunnar Santa Barbara, Bridget og Jerome Dobson. Þættirnir voru gríðarlega vinsælir um nokkurra ára skeið hér á landi á tíunda áratug síðustu aldar en hin íslenska María Ellingsen lék í þáttunum ásamt Robin Wright og fleirum.