Á samfélagsmiðlum hefur undanfarið verið mikið rætt um þjóðþekkta menn sem sakaðir eru um misferli gagnvart ungri konu. Um er að ræða tvö aðskilin atvik.
Meintur brotaþoli á að hafa átt í ástarsambandi við einn mannanna, sem er kvæntur. Fyrr í vetur birtust frásagnir af því að hún hafi hitt elskhuga sinn og vini hans á óþekktum stað og farið með þeim í heitan pott. Umræddir menn eru allir töluvert eldri en konan.
Konan birti opinskáar og sláandi lýsingar á Instagram sem hafa vakið gríðarlega athygli og umræður á Twitter. Í heita pottinum áttu mennirnir að hafa brotið á konunni kynferðislega, meðal annars með því að stinga fingrum í endaþarm hennar. Þeir hafi síðan læst hana inni á herbergi, látið hana afklæðast og haft við hana munnmök.
Meintir gerendur eru sagðir valdamiklir í samfélaginu, sem og fjölskyldumenn.
Seinna atvikið, sem sama kona lýsir, átti sér stað í golfferð í haust, þar sem hún var stödd með manninum sem hún átti í ástarsambandi við, ásamt hópi af vinum hans. Þar á einn vinurinn að hafa gengið inn á parið í ástaratlotum. Ástmaðurinn á síðar að hafa fengið þann vin sinn inn á herbergi til þeirra og boðið honum að snerta konuna á óviðeigandi hátt, í þeim tilgangi að kaupa þögn hans. Báðir eru mennirnir þjóðþekktir og vinurinn bæði opinber persóna og hátt skrifaður í samfélaginu. Tekið skal fram að atburðarás þessi er samkvæmt frásögn konunnar.
Mannlíf hafði samband við vin mannsins sem konan átti í ástarsambandi við, þann sem sagður er hafa gengið inn á þau í fyrrnefndri golfferð. Maðurinn svaraði því játandi, aðspurður hvort hann hefði orðið var við þær sögur sem hefðu verið á sveimi á samfélagsmiðlum.
„Ég hef ekki tíma til að tala um þetta,“ sagði maðurinn og neitaði að tjá sig um málið.
Mannlíf reyndi ítrekað að ná sambandi við manninn sem sagður var eiga í ástarsambandinu, án árangurs, en mun halda áfram að reyna að ná tali af honum.