Bólusetningar barna frá 5 til 11 ára, gegn Covid-19 stendur nú sem hæst. Þó að langflestir landsmenn treysti á heilbrigðisstarfsfólk og vísindamenn hvað varðar heilsu barnanna okkar er þó hópur manna sem hefur áhyggjur af téðum bólusetningum. Ágústa Eva Erlendsdóttir er ein af þeim sem hefur áhyggjur.
Mannlíf fékk sent skjáskot af skilaboðum frá Ágústu Evu þar sem hún boðar friðsamleg mótmæli gegn bólusetningum barna í Laugardalshöll. Þar skrifar hún meðal annars að fólk verði að standa saman og slá þungan takt til marks um þungan hug þeirra „gagnvart aðgerðum á börnum landsins með ósamþykktum og óafturkræfum sprautum.“ Biður hún fólk að vera rólegt en taka með sér slagverk að heiman en þeir sem séu tvístígandi mæti málaðir hvítir í framan með hettu. „Stöndum saman að endamarki, fyrir framtíð Íslands,“ stendur svo í lok skilaboðanna.
Ekki veit Mannlíf til þess að einhver hafi mætt á mótmælin eða hvort hætt hafi verið við þau en engar fréttir hafa borist af mótmælum.
