Snæbjörn Björnson, íbúi í Kristiansand í Noregi, fékk rafmagnsreikning upp á 33.000 íslenskar krónur eftir þriggja vikna fjarveru frá heimili sínu. Hann segir aðeins ísskápinn og einn ofn hafa verið í gangi á þessum vikum .„Nú er komið í slíkt óefni, að ríkisstjórnin ákvað að niðurgreiða hluta af reikningum fólks, því margir eru komnir á hnén“ segir Snæbjörn.
Það hefur verið í umræðunni upp á síðkastið að leggja sæstreng frá Íslandi og selja rafmagn til Evrópu, líkt og gert hefur verið í Noregi. Ólafur Ragnar Grímsson, fyrrverandi forseti Íslands og forsvarsmaður þingsins Hringborðs Norðurslóða ræddi hugmyndina um sæstreng í Silfrinu:
„Við þurfum að skoða það vegna þess að Norðmenn eru búnir að sanna það að þetta er tæknilega hægt og þetta er aðferðin til að veita Evrópu hreina orku, Ég held að mesta vandamálið fyrir okkur á Íslandi, ef við ætlum áfram að segja bann við streng, verður þegar Grænlendingar banka upp á, vegna þess að Grænland er eitt öflugasta forðabúr af vatnsaflsorku sem er eftir á Vesturlöndum, og þeir gætu velt því fyrir sér að koma með streng frá Grænlandi í gegnum Ísland, í gegnum Færeyjar til Bretlands og þaðan til Evrópu“
Snæbjörn segir þetta háa rafmagnsverð vera vegna þessa sæstrengs: „Verðið á rafmagni hér í Noregi er helvítis köplunum til Evrópu að þakka“
Verð á rafmagni hér á landi er töluvert lægra en það sem þekkist hjá nágrönnum okkar í Noregi en einhver verðmunur er hjá raforkufyrirtækjum en lægsta verðið er hjá N1 og Straumlind þar sem meðalkostnaðurinn á mánuði er 2683 krónur en hæsta verðið er hjá Orku Náttúrunnar þar sem meðalkostnaður er 3675 krónur.