Talsvert var um líkamsárásir í gær og í nótt samkvæmt dagbók lögreglunnar. Einnig voru meintir eiturlyfjasalar handteknir og aukreitis ökumaður sem braut sóttvarnarlög en hann átti að vera í einangrun.
Tilkynnt var um líkamsárás í hverfi 105 í gær en einn var handtekinn á vettvangi og vistaður í fangaklefa. Ekki er vitað um meiðsli þess sem ráðist var á.
Í gærkvöldi var óskað eftir aðstoð lögreglu í bílastæðahúsi í miðbænum vegna einstaklings sem þar svaf ölvunarsvefni. Neitaði einstaklingurinn stjörnufulli að yfirgefa húsið sjálfviljugur og þegar lögreglumenn ætluðu að hjálpa honum út sparkaði hann í þá. Var hann handtekinn í kjölfarið og vistaður í fangaklefa.
Í tveimur tilfellum voru ökumenn stöðvaðir í gær og í nótt, grunaðir um að keyra undir áhrifum.
Þá var bifreið stöðvuð í hverfi 104 en reyndist ökumaðurinn vera alsgáður en smitaður af Covid-19. Hann var því að brjóta einangrun og þar með sóttvarnarlög. Má hann eiga von á kæru vegna málsins.
Tveir voru svo handteknir í hverfi 105, grunaðir um vörslu og sölu fíkniefna.
Þá var aukreitis tilkynnt um þjófnað og líkamsárás í hverfi 104 í nótt. Einn var handtekinn grunaður um málið og vistaður í fangaklefa.