Skíðamaðurinn ungi, Hilmar Snær Örvarsson, sem skíðar fyrir Víking, varð í gær fimmti í svigi á Heimsmeistaramóti IPC í Lillehammer, Noregi. Hilmar var níundi eftir fyrri ferðina en náði að hífa sig upp í fimmta sætið í seinni ferðinni.
Hvatisport.is sagði frá málinu í gær. Þar kemur fram að Hilmar hafi þannig lokið keppni á Heimsmeistaramótinu í 21. sæti í stórsvigi og 5. sæti í svigkeppninni. Alls voru 40 keppendur í standandi flokki Hilmars á mótinu en þar voru komnir saman allir fremstu skíðamenn heims en mótið er liður í lokaundirbúningi fyrir Vetrar Paralympics sem haldið verður í Kína í mars.
Í samtali við Hvatisport.is sagðist annar tveggja þjálfara Hilmars, Þórður Georg Hjörleyfsson, afar ánægður með sinn mann. „Hilmar átti gríðarlega góða seinni ferð í dag, sér í lagi í efri parti brautarinnar. Hann var alveg geggjaður en nokkur munur var á brautinni í fyrri og seinni ferð og má segja að brautin í seinni ferðinni hafi hentað honum vel sem skíðamanni. Nú tekur við undirbúningur fyrir Vetrar Paralympics og það verður ekki síður spennandi keppni þar á ferðinni,” sagði Þórður Georg sem þjálfar Hilmar ásamt Marko Spoljaric.