Tómas Guðbjartsson hjartalæknir svaraði á Facebook, skrifum Jóns Steinars Gunnlaugssonar lögmanns sem birtust í Morgunblaðinu í dag og Mannlíf fjallaði um.
Sjá einnig: Sakar lækna um hræðsluáróður til að fá meira fjármagn: „Þeir viti betur en sauðsvartur almúginn“
Ber svarpistill Tómasar nafnið Feilskot fyrrverandi hæstaréttadómara en þar segir læknirinn að lögmaðurinn sendi sér og kollegum sínum á Landspítala „súra pillu.“
„Jón Steinar Gunnlaugsson sendir mér og fleiri kollegum mínum á Landspítala súra pillu á heimasíðu sinni í pistli sem hann kallar Frelsi í stað valdbeitingar. Þar segir: „Látum ekki einsýna lækna villa okkur sýn. Kannski eru þeir bara að búa til stöðu sem þeir telja að þrýsti á um hærri framlög úr ríkissjóði (les: frá skattgreiðendum) til Landspítalans?“ Þessi orð hans eru bæði órökstudd og lágkúruleg – og ótrúlegt að þarna haldi á penna fyrrverandi hæstarréttardómari.“
Næst útskýrir Tómas af hverju hann hefur ekki viljað aflétta sóttvarnartakmörkunum hratt. Er það meðal annars vegna þess að hann vill ekki að starfsemi sjúkahússins lamist á nokkrum dögum.
„Það er rétt að mér hefur ekki hugnast að aflétta sóttvarnartakmörkunum hratt, eða í einum rykk. Þar skiptir fleira máli en fjöldi Covid-innlagna, t.d. að starfsfólk sýkist ekki í veldisvexti þannig að starfsemi sjúkrahússins lamist á nokkrum dögum. Við sjáum vel á Evrópumótinu í handbolta hversu smitandi omicron er, en með slíka sýkingu mætir enginn til vinnu á sjúkrahúsi. Ný gögn sýna þó sannarlega að Landspítalinn er að komast fyrir vind í þessari síðustu bylgju – og álagið á deildum, og þá sérstaklega gjörgæslunum, skánar dag frá degi. Ekki má þó gleymast að enn greinast hátt í 50 einstaklingar á dag með delta-afbrigðið – og margir – m.a. fjölskyldumeðlimir mínir og vinir – eru talsvert veikir af omicron – þótt ekki hafi þeir þurft innlögn eða gjörgæslu. Enn eru á gjörgæsludeildum okkar lífshættulega veikir Covid-sjúklingar og stór hluti helgarvaktarinnar farið í að sinna þeim. Þessum veiku sjúklingum fækkar þó og vandamálið viðráðanlegra.“
Að lokum segir Tómas að afléttingar séu sem betur fer í kortunum en að þær verði að taka í „skynsömum og ópólistískum skrefum.“ Þá svarar hann einnig fyrir þau orð Jóns Steinars að hann og kollegar hans séu að hugsa um hagsmuni annarra en sjúklinga sinna og samfélagsins alls.
„Afléttingar sóttvarna eru því sem betur fer í kortunum – en þær verður að taka í skynsömum og ópólistískum skrefum. Ég er nefnilega hjartanlega óssammála hæstaréttardómaranum fyrrvernadi að sóttvarnir gegn Covid séu „móðursýki“ og „sósíalismi“. Þar hef ég ekki síst í huga heilsu þeirra fjölmörgu ónæmisbældu einstaklinga sem búa í okkar ágæta samfélagi – og eiga undir högg að sækja – en jafnvel omicron getur gert þeim alvarlega skráveifu. Að ýta þeim hreinlega til hliðar og leggja í lífshættu – er algjörlega óásættanlegt – enda gera það engar siðmenntaðar þjóðir. Að halda síðan fram að mér eða kollegum mínum gangi eitthvað annað til en gæta hagsmuna sjúklinga okkar og samfélagsins alls – er vítaskot sem ratar beint upp í stúku.“