Grindavík vann kvennalið Fjarðabyggðar/Hattar/Leiknis 0-6 síðastliðinn laugardag en sigurinn var kærður því Grindavík lék leikinn með þrjá ólöglega leikmenn.
Kvennaliði Fjarðabyggðar/Hattar/Leiknis í knattspyrnu hefur nú verið dæmdur 3-0 sigur í leik gegn Grindavík sem fram fór um síðustu helgi fyrir austan, vegna þess að gestirnir notuðu þrjá ólöglega leikmenn í leiknum. Austurfrétt fjallaði um málið í dag.
Fram kemur í úrskurði Knattspyrnusambandi Íslands að þrír erlendir leikmenn Grindavíkur hafi verið skráðir í erlend félög og því ólöglegir í leiknum. Allir léku þeir í byrjunarliðinu er liðin hittust í Fjarðabyggðarhöllinni á Reyðarfirði í B deild Lengjubikarsins. Sigraði Grindavík 0-6. Auk þess að vera dæmdur ósigur er Grindavík gert að greiða 120.000 í sekt.
Fram kemur í Austurfrétt að Fjarðabyggð/Höttur/Leiknir eigi næst leik á heimavelli gegn HK á laugardaginn.