Vítalía Lazareva hefur að eigin sögn lagt fram kærur á hendur þeim Þórði Má Jóhannessyni, Ara Edwald og Hreggviði Jónssyni.
Er það vegna máls sem hún greindi frá í hlaðvarpsþættinum Eigin konur í janúar, þar sem hún sakaði mennina um kynferðisofbeldi í sumarbústað sem hún var stödd í ásamt þáverandi kærasta sínum, Arnari Grant.
„Ég vaknaði bara klukkan átta og hugsaði að í dag væri kominn dagurinn til þess að gera þetta,“ segir Vítalía í samtali við blaðamann Mannlífs.
„Ég hafði fengið að heyra það að þeir Þórður Már og Hreggviður væru að leggja áherslu á að vinna í sjálfum sér og væru byrjaðir að vinna aftur.“
Hún segist líka hafa heyrt af því að Þórður Már talaði um það út á við að hún væri að segja ósatt – að ásakanirnar væru uppspuni. „Hann er að tala um að ég sé lygari. Ég veit til þess að hann vill ekki viðurkenna neitt.“
„Ég er bara að standa með sjálfri mér,“ segir Vítalía við blaðamann. „Það tók mig tíma að gera þetta náttúrulega, þetta er stórt skref. Ég er að vinna í sjálfri mér. Við verðum bara að halda áfram; ég er ekki að fara í stríð við neinn, ég er bara að gera það sem er rétt að gera.“
Fréttin hefur verið uppfærð.