Sósíalistaforinginn Gunnar Smári Egilsson skaut þéttingsfast á Bjarna Benediktsson fjármálaráðherra í Facebook-færslu Sósíalistaflokksins í dag. Birt hann ljósmynd af Bjarna sem Gunnar Smári segir að tekin sé í fríi Bjarna í Taomina á Sikiley.
Í færslunni veltir Gunnar Smári því fyrir sér hvort Bjarni hafi verið þarna á helgarnámskeiði hjá Cosa Nostra, sikileysku mafíunni, sem á sér djúpar rætur í Taormina.
„Meðan reiðialda gekk yfir samfélagið vegna Íslandsbankasölunnar og grasrót Sjálfstæðisflokksins þurfti að svara fyrir spillingu flokksins og formanns hans í fermingarveislum og öðrum fjölskylduboðum, sat formaðurinn í góðu veðri í Taormina á Sikiley … of all places, eins og sagt er. Okkur er ókunnugt um hvort Bjarni var þarna á helgarnámskeiði hjá Cosa Nostra, sikileysku mafíunni, en hún á sér djúpar rætur í Taormina. Þar voru t.d. eftirminnilegar senur í Guðföðurnum II teknar upp. Þegar Bjarni sneri aftur heim var fylgi flokksins hrunið á landsvísu og í borginni, almenningurinn búinn að missa traust á Bjarna sjálfum og stefndi í sögulegt tap Sjálfstæðisflokksins í borgar- og sveitarstjórnarkosningum. Bjarni baulaði í nokkrum viðtölum en hefur síðan haldið sig til hlés til að valda flokki sínum ekki meiri skaða.“
