Lilja Dögg Alfreðsdóttir, menningar- og viðskiptaráðherra, og Pétur Óskarsson, framkvæmdastjóri Íslandsstofu, undirrituðu í dag samning um kynningu á endurgreiðslukerfi kvikmynda á Íslandi – Film in Iceland.
Vaxandi áhugi hefur verið á Íslandi sem tökustað og verkefni Film in Iceland, er að kynna Ísland sem áhugaverðan tökustað, endurgreiðslukerfi vegna framleiðslu kvikmynda- og sjónvarpsefnis, innviði íslenska kvikmyndaumhverfisins og að taka við fyrirspurnum erlendra framleiðanda og aðstoða þá eftir fremsta megni.
Spurningar hafa verið settar við það hvort að þetta sér rétta leiðin. En menningar- og viðskiptaráðherra vill meina að þetta rennir mikilvægum stoðum undir þau markmið stjórnvalda að efla íslenskan kvikmyndaiðnað og gera Ísland að eftirsóknarverðum tökustað fyrir fjölbreytt kvikmynda- og sjónvarpsverkefni.
Í samningnum er kveðið á um að Íslandsstofa taki að sér kynningar á erlendum kvikmyndahátíðum, auglýsingar í fagtímaritum, öflun viðskiptasambanda, svörun og úrvinnslu fyrirspurna og almenna aðstoð við erlend framleiðslufyrirtæki sem hafa áhuga á að taka upp kvikmynda- eða sjónvarpsefni hér á landi.
Til að styðja enn frekar við íslenskan kvikmyndaiðnað mun ráðherra leggja fram á Alþingi frumvarp um breytingu á lögum um endurgreiðslur vegna kvikmyndagerðar, nú á vorþingi. Með lagabreytingunni munu stærri kvikmyndaverkefni fá 35% endurgreiðslu framleiðslukostnaðar, í stað 25%.