Anton Máni Svansson frá Join Motion Pictures var kosinn formaður Sambands íslenskra kvikmyndaframleiðenda, SÍK, á aðalfundi félagsins sem fram fór í gær.
Ljósmynd: Aðsend
Anton er meðeigandi kvikmyndaframleiðslufyrirtækisins Join Motion Pictures og hefur starfað sem framleiðandi og framkvæmdastjóri þess undanfarin 15 ár. Hann hefur meðal annars framleitt myndirnar Hjartasteinn, Hvítur, hvítur dagur, Berdreymi og Volaða land. Kvikmyndir hans hafa verið frumsýndar á stærstu hátíðum heims, þar á meðal í Cannes, Berlín, Feneyjum, Locarno og Toronto og hafa hlotið yfir 170 alþjóðleg verðlaun ásamt 16 Eddu-verðlaunum. Þar að auki hlaut hann Lorens verðlaunin fyrir kvikmyndaframleiðanda ársins á Gautaborgarhátíðinni í Svíþjóð árið 2017.
Aðrir í stjórn SÍK eru Hilmar Sigurðsson, Inga Lind Karlsdóttir, Guðbergur Davíðsson og Júlíus Kemp. Varamenn eru Kristinn Þórðarson og Hlín Jóhannesdóttir.