Slökkviliðsmenn á Norður-Spáni keppast við að ná tökum á skógareldum sem geysa nú á svæðinu. Gríðarleg hitabylgja er nú á Spáni og hefur hitinn sjaldan mælst svo hár á þessum tíma árs. Fréttamiðillinn The Guardian fjallaði um málið en hundruð íbúa hafa þurft að yfirgefa heimili sín.
Lögreglan á Spáni sendi frá sér yfirlýsingu í gær þar sem greint var frá því að betur gengi að ná tökum á eldunum, en rúmlega 600 slökkviliðsmenn tóku þátt í slökkvistarfinu. Sergi García, umhverfisverndarsinni á Spáni, sagði eldana mikið áhyggjuefni en hluti svæðisins sem varð eldinum að bráð er talið eitt mesta lífríki í Evrópu.
Meira en 70 fuglategundir þrífast í skóginum, en svæðið er þekkt fyrir að vera heimkynni eins stærsta úlfastofns í Vestur-Evrópu. Úlfategundin er kennd við Íberíuskagann hefur fjölgað jafnt og þétt við góðar aðstæður. Aðeins nokkur hundruð úlfar voru eftir á svæðinu fyrir tæpum fimmtíu árum, en í dag eru þeir um 2.500 talsins. Enn er óljóst hversu mikil áhrif eldarnir höfðu á lífríkið í skóginum, en unnið er að því hörðum höndum að halda eldunum í skefjum.