Nýja húðvörulína Kim Kardashian, sem beðið hefur verið eftir með nokkurri eftirvæntingu, er komin út.
Nýja línan, sem Kim framleiðir undir merkinu SKKN BY KIM, inniheldur níu vörur; hreinsi, skrúbb, andlitsvatn, rakaserum, C vítamín serum, augnkrem, andlitskrem, olíudropa og næturolíu.
Mikil eftirvænting hefur ríkt fyrir vörunum í snyrtivörubransanum og hafa þær til að mynda mikið verið auglýstar í samfélagsmiðlaherferðum eins og fröken Kardashian einni er lagið og pakki sem inniheldur allar vörurnar saman er strax orðinn uppseldur.
Nú má sjá risavaxin auglýsingaskilti fyrir útgáfu varanna á Times Square.
„Í öllum mínum viðskiptaævintýrum hef ég verið knúin áfram af ástríðu minni til að fylla upp í göt á markaðnum með því að skapa frammistöðudrifnar vörur af hugviti. Ég hef núna skapað húðvörumerki með þessum sama drifkrafti og nálgun,“ segir Kim um nýju vörurnar, líkt og kemur fram hjá E Online.
Hún útskýrir einnig hvernig hennar eigin barátta leiddi til stofnunar þessa nýja vörumerkis. „Það sem byrjaði sem sóríasis-greining varð hvatinn að ferðalagi mínu um uppgötvun húðumhirðu, hvatti mig til að læra meira um húðina mína og hvernig á að sjá um hana. Það að vinna með nokkrum af fremstu húðlæknum og snyrtifræðingum heims í gegnum árin hefur gefið mér ótrúlegt tækifæri til að læra af sérfræðiþekkingu þeirra – og ég vissi að ég yrði að deila lærdómi mínum.“
