Nýtt og spennandi eintak af tímariti Mannlífs er komið út, bæði í vefútgáfu og á prenti. Nálgast má ókeypis eintak í verslunum Hagkaupa, í Bónus og á N1.
Í blaðinu má finna ógrynnin öll af áhugaverðum viðtölum, umfjöllunum og pistlum.
Forsíðuviðtalið að þessu sinni er við leikarann og skemmtikraftinn Sverri Þór Sverrisson, eða Sveppa eins og hann er yfirleitt kallaður. Hann fer yfir feril sinn og það sem markaði upphaf hans; þegar hann gekk hringinn í kringum Ísland í tvo mánuði. Hann ræðir einnig um æskuárin, fjölskyldulífið og það sem framtíðin mun hugsanlega bera í skauti sér.
Í blaðinu er ítarlegt viðtal við Sonju Ingvadóttur, en hún er ein þeirra sem vistuð var á stúlknaheimilinu Bjargi á Seltjarnarnesi, á árunum 1965 til 1967. Fjölmiðlar fjölluðu á sínum tíma um Bjarg og ásakanir um ofbeldi og harðræði sem nokkur fjöldi kvenna og nærstaddra lýstu að þar hefði viðgengist. Þetta er í fyrsta sinn sem Sonja segir sína sögu af heimilinu opinberlega en hún ber meðal annars séra Auði Eiri Vilhjálmsdóttur, sem starfaði á heimilinu og átti frumkvæði að stofnun þess, þungum sökum.
Blaðamaður hitti síðan séra Auði Eiri, sem svaraði þeim ásökunum sem á hana og heimilið hafa verið bornar.
Fastir liðir eru á sínum stað; helgarpistillinn, sakamálið, baksýnisspegillinn og lífsreynslusaga, ásamt spennandi og skemmtilegum viðtölum. Við fáum til að mynda að líta inn í garðinn hjá Gretu Salóme á griðastað fjölskyldunnar í Mosfellsbæ.
Vefútgáfu blaðsins má lesa hér en einnig má nálgast ókeypis eintak í Hagkaup, Bónus og á N1.
