Eitthvert einkennilegasta fréttamál sumarsins er fréttasyrpa Morgunblaðsins um Sigmund Erni Rúnarsson, ritstjóra Fréttablaðsins. Dregin var fram 40 ára grein Sigmundar úr DV og gefið til kynna að efni greinarinnar væri stolið frá Tómasi Guðmundssyni skáldi. Sigmundur Ernir var þannig stimplaður sem ritþjófur af sama toga og Hannes Hólmsteinn Gissurarson prófessor sem tók án heimildar texta frá Halldóri Kiljan Laxness og gerði að sínum. Sigmundur hefur nú svarað Davíð Oddssyni, ritstjóra Moggans, fullum hálsi og snýtir honum duglega.
„… Blaðið leggur sig fram um að segja ekki hvers eðlis umrædd grein er. Í lok hennar stendur skýrum stöfum að um samantekt sé að ræða, sem merkir að textabrotin eru ættuð héðan og þaðan. Undirritaður hefur upplifað ýmislegt á ríflega 40 ára fjölmiðlaferli, en man vart eftir annarri eins fréttaþurrð og þessi skrif endurspegla,“ skrifar Sigmundur í svari sínu við ásökun Davíðs.
Mogginn hefur á sér það orð að gefast seint upp í ósvífni sinni og beita flestum meðulum til að koma höggi á samkeppnisaðila og andstæðinga sína. Beðið er eftir næsta útspili hans í stríðinu gegn Sigmundi og Fréttablaðinu …