Forvarnarhópurinn Bleiki fíllinn hefur tekið þá ákvörðun að hætta eftir 10 ára farsælt starf. Var hann upprunalega stofnaður sem forvarnarhópur ÍBV og þjóðhátíðarnefndar.
Eyjar.net segir frá málinu en þar kemur fram að á vefsíðu Þjóðhátíðar árið 2012, hafi verið tilkynnt að þann 28. júní, 2012 hafi grasrótarhreyfin í Vestmannaeyjum og þjóðhátíðarnefnd ÍBV, ákveðið að stofna forvarnarhóp ÍBV. „Hópurinn hefur fengið það hlutverk að standa fyrir sérstöku átaksverkefni gegn kynferðisofbeldi og verður það verkefni áberandi á Þjóðhátíð í Vestmannaeyjum.”
Í gær kom fram í færslu á facebook-síðu hópsins að eftir tvær MeToo-byltingar hefði vafalítið mikið áunnist þó enn sé langt í land.
„Við í hópnum erum þó orðin lúin og teljum að nú séu kaflaskil í starfi okkar. Hver sem framtíðin verður viljum við nota tækifærið nú og þakka fyrir ómetanlegan stuðning gegnum árin. Við hófum störf í afar ólíku landslagi en við sjáum nú. Orðræðan var allt önnur og viðhorf til kynferðisofbeldis voru oftast nær einföld; þagga niður þetta óþægilega mein samfélags okkar. Slagorð okkar voru því skýr: Það er bleikur fíll í stofunni, vandamál sem allir vita af en enginn vill ræða. Því þarf að breyta,“ segir í færslunni.
Hópurinn hvetur þó fólk til að halda áfram að bera merki hópsins en með því sé verið að stuðla að vitundarvakningu. „Þegar þið berið merki hópsins eruð þið að stuðla að vitundarvakningu og umræðu. Ekki hætta því. Þannig eruð þið hluti af lausninni en ekki vandanum. Þið viljið ekki bleika fíla í ykkar liði, þið viljið að fólk ræði um mikilvægi samþykkis, þið styðjið þolendur, þið viljið ekki stinga hausnum í sandinn, þið viljið stuðla að breytingum.“