Talið er að ríflega fimm þúsund manns hafi lagt leið sína að gosinu í Meradölum í gær. Ljóst er að þar var misjafn sauður í mörgu fé. Margir voru áberandi illa klæddir, jafnvel berfættir.
Bogi Adolfsson, formaður björgunarsveitarinnar Þorbjörns, kvartar undan drykkjuskap ferðalanga í samtali við RÚV. Þrátt fyrir þetta voru engin alvarleg slys í gær þó margir hafi ofkælst.
Bogi segir auðvelt að forðast ofkælingu, fólk þarf að klæða sig eins og fullorðið fólk. Hann segir að þeir sem ofkældust í gær hafi verið í stuttbuxum og stuttermabolum.
Bogi biðlar svo til almennings að láta áfengi eiga sig þegar gosið er skoðað. „Það var Þjóðhátíð í síðustu viku. Þetta er ekki brenna og það verður ekki flugeldasýning,“ segir Bogi við RÚV.
Hér fyrir neðan má sjá myndir sem teknar voru við gosið í gær:
