Elsta kona Íslands, Þórhildur Magnúsdóttir, gerði sér lítið fyrir um helgina og skellti sér á rúntinn á fjórhjóli. Þórhildur er 104 ára en óneitanlega ung í anda. Raunar lætur hún marga sem eru hálfri öld yngri en hún líta illa út, líkt og þegar hún dansaði fram til miðnættis í brúðkaupi í sumar.
Sjá einnig: Þórhildur hefur lifað lengst allra Íslendinga: „Dansaði fram yfir miðnætti“
Þetta kemur fram á Facebook-síðunni Langlífi sem Jónas Ragnarson ritstýrir. Þar segir: „Þórhildur Magnúsdóttir sem er elsti Íslendingurinn, 104 ára og 8 mánaða, og býr á Hrafnistu á Sléttuvegi fór í sunnudagsbíltúr með ættingjum sínum í gær. Eftir að hafa fengið kaffi á Nauthóli brá hún sér á bak á fjórhjóli með Kristjáni Ómari sem er langömmubarn hennar. Þau óku einn hring á bílastæðinu og nutu ferðarinnar. Þórhildur verður 105 ára í desember en miðað við hvað hún er ungleg og hress gæti hún átt eftir að bæta mörgum árum við.“