Brynjar Níelsson, varaþingmaður og aðstoðarmaður ráðherra, segir að eiginkona hans fagni því að hann ætli að vera minna neikvæður. Því hefur hann lofað, þó vafalaust í gríni. Brynjar skrifar á Facebook:
„Soffía er enn valhoppandi af gleði yfir síðustu færslu minni. Gleðin var slík í gær að hún ákvað að elda handa mér hrossabjúgu með uppstúf og grænum baunum. Stærri verða ástarjátningar ekki í mínum huga. Rétt er að taka það fram að þessi uppáhaldsmatur minn hefur sjaldan verið á boðstólum öll hjúskaparár okkar Soffíu. Má segja að þessi gourmet réttur hafi verið bannaður heima hjá mér. Heimsóknir til aldraðrar móður björguðu mér lengi vel.“
Hann segist svo ætla að biðja alla þá sem hann hefur móðgað afsökunar, nema Namíbíumenn. „Mig grunar að Soffía sé í einhverju sambandi við meðferðarfulltrúann um aðferðir til að ná úr mér neikvæðninni og eitruðu karlmennskunni. Hefur komið til tals eitthvert afbrigði af 12 spora kerfinu. Mér skilst að ég eigi að banka upp á hjá öllum sem ég hef verið leiðinlegur við, að hætti namíbíumanna, og biðjast afsökunar á leiðindum mínum. Best væri að byrja á Bubba, síðan Dodda á Kjarnanum og svo koll af kolli og enda á Gunnari Smára. Þetta verða asskoti margar heimsóknir. Vonast þó til að sleppa við að þurfa að fara til Namibíu.
Ég frétti áðan innan úr ráðuneytinu að komið hefði beiðni um að fá að reka veðbanka til að menn geti veðjað um hvað ég geti haldið mig lengi frá neikvæðni og leiðindum. Grunar að sú beiðni hafi komið úr Valhöll.“