Egill Helgason fjölmiðlamaður þakkar Ragnheiði Thorsteinsson kærlega fyrir samstarfið á Facebook. Ragnheiður er svokallaður pródúsent á RÚV og hefur því bak við tjöldin haft talsverð áhrif á íslenska þáttagerð.
Egill segir hana ósungna hetju. „Þetta er hún Ragnheiður Thorsteinsson eða Ragga Thorst. Hún er samstarfskona mín til margra ára. Ragga á ef eitthvað er meira í þáttum eins og Bæir byggjast en ég – svo því sé haldið til haga. Hún er sérlega nösk að finna gamalt myndefni og klippa það saman svo úr verður frábær heild með nýrra efni. Hún er líka sérlega góð í að ná fram stemmingu með því að velja tónlist við hæfi,“ segir Egill.
Hann segir Röggu eiga skilið heiðursverðlaun. „Ég held ég hafi skrifað eitthvað svipað í tengslum við fyrri þáttagerð okkar, en ég meina þetta og finnst að Ragga eigi að fá sérstök heiðursverðlaun fyrir framlag sitt til sjónvarps á Íslandi. Samstarfsfólk okkar í bransanum skilur hvað er ég að fara. Næsti. þáttur okkar er svo um Vestmannaeyjar.“
