Alda Ægisdóttir er 23 ára myndlistarnemi en hún er á öðru ári sínu í Listaháskóla Íslands. Hún hefur nú búið til í samstarfi við Kringluna, fjögurra metra langa flugu sem hangir í miðri Kringlunni frá deginum í dag til 25. október.
Ljósmynd: Aðsend
„Mér finnst þetta verk sérstaklega spennandi af því að ég vil gjarnan að listin mín sé aðgengileg fyrir almenning. Það er svo afmarkaður hópur sem mætir allajafna á listasýningar, og fólkið sem ég vil ná til eru ekki endilega þeir sem hafa stúderað myndlist. Til dæmis hafa börn verið mjög hrifin af verkum mínum,“ segir Alda í samtali við Mannlíf og heldur áfram: „Á tímum eins og í dag þar sem margt slæmt er að gerast í heiminum, finnst mér listin gegna mikilvægu hlutverki við að skína ljósi á fallegu og glaðlegu hliðar lífsins. Flugan mín í Kringlunni tilheyrir heimi sem ég hef verið að þróa með innblæstri frá náttúrunni, teiknimyndum og öðrum myndlistarmönnum.“
Alda er með sýningu sem heitir Útópía á Borgarbókasafninu Grófinni með verkum sem tilheyra öll sömu veröld en sýningunni líkur næstkomandi sunnudag, 23. október. Þá er 66 gráður Norður einnig með nokkra skúlptúra úr þessum heimi Öldu í búðargluggum sínum á Hafnartorgi en verslunin keypti skúlptúrana af Öldu fyrr í haust.