Þorsteinn Már Baldvinsson, forstjóri Samherja, er orðinn þreyttur á eilífum deilum í íslensku samfélagi þegar kemur að sjávarútvegsfyrirtækjum og greiðslu veiðigjalda. Hann bendir á að í Noregi þurfi fyrirtækin ekki að greiða veiðigjöld.
„Hér er orðið mjög þreytandi að hlusta á þessar deilur og reyndar að hluta til nánast annan hvern dag. Um veiðigjöldin já og framtíð sjávarútvegs á Íslandi, fyrirkomulag, stærð fyrirtækja og svo framvegis,“ segir Þorsteinn Már.
Hagnaður íslenskra sjávarútvegsfyrirtækja fyrir afskriftir hefur ekki verið hærri um árabil en arðgreiðslur námu næstum tuttugu milljörðum króna í fyrra. Veiðigjöldin voru hins vegar lægri en fyrir þremur árum. Þorsteinn Már segir þreytandi að hlusta á eilífar deilur um veiðigjöld. Þau eigi að vera hófleg, að mati forstjórans.
Svandís Svavarsdóttir matvælaráðherra boðaði nýlega breytingar á sjávarútvegslögum, Samherjaforstjórinn vill koma að þeirri vinnu. „Ég hefði talið æskilegt að það væru fleiri frá atvinnugreininni í þessum nefndum, hvort sem það eru sjómenn, fiskverkafólk eða framleiðendur,“ segir Þorsteinn Már.
Samherji er nú orðinn einn stærsti hluthafi Síldarvinnslunnar sem aftur keypti útgerðarfyrirtækið Vísi í Þorlákshöfn í sumar. Með kaupunum á Samherji nú aðild að ríflega fjórðung af heildarkvótanum, sem er yfir lögbundnu hámarki.
„Fiskistofa hefur eftirlit með þessu og við höfum farið að öllum lögum í þessu eins og öllu öðru,“ segir Þorsteinn í samtali við Vísi.