„Ég vil virkilega að hann komi aftur heim og yfirgefi landsliðið til að hann geti setið við hliðina á mér og ég geti faðmað hann að mér, sannfært hann um að allt verði í lagi, minnt hann á hverju hann hefur áorkað og hvaðan hann kom,“ skrifaði Katia Aveiro, systir knattspyrnukappans Cristianos Ronaldo, í færslu á samfélagsmiðlum.
Eins og frægt er orðið var Ronaldo hent á varamannabekkinn í leiknum gegn Sviss í 16 liða úrslitum HM á þriðjudaginn. Fjölskylda Ronaldos stendur alltaf þétt við bakið á honum og var eins og við mátti búast ósátt við ákvörðun Santos.
Katia gráðbiður bróður sinn um að hætta í portúgalska landsliðinu:
„Ég vil ekki lengur að hann sé þarna. Við höfum þjáðst nóg og smámennin munu aldrei vita hversu stór þú ert. Komdu heim þar sem fólkið skilur þig, umvefur og sýnir þakklæti.“