Hjónin og arkitektarnir Ellert Hreinsson og Rebekka Pétursdóttir taka vel á móti okkur á fallegu heimili í Kópavogi en þar búa þau ásamt börnum sínum þremur, tvíburunum Bergi og Eik og eldri systur þeirra, Agnesi Ösp. Húsið er byggt árið 1965, er 214 fermetrar að stærð og teiknað af Sigvalda Thordarson arkitekt.
Það fyrsta sem grípur auga blaðamanns þegar inn er komið er óhefðbundin umgjörðin í kringum stigann. Bæði þrepin og veggurinn á hægri hönd þegar gengið er upp eru teppalögð með fallega grænu teppi og led-lýsing gefur rýminu aukna dýpt og dramatík. Aðspurð um tilkomu þess að teppaleggja vegginn segja þau það hafa verið gert til að bæta hljóðvistina og glæða rýmið meiri hlýju.
„Mönnunum sem komu að teppaleggja fannst í upphafi verks stórskrítið að teppaleggja vegginn en í lok dags voru þeir sáttir við útkomuna og fannst þetta koma skemmtilega á óvart. Við smíðuðum síðan í kringum stigaopið skápa, hillur og blómaker úr mdf-plötum sem við máluðum með steypumálningu frá Detale CPH.“
Útkoman er stórglæsileg og alltaf gaman að sérsniðnum lausnum eins og þessari sem henta rýminu fullkomlega og ýta undir fegurð þess.
Ljósmyndir / Hallur Karlsson