Sólveig Anna Jónsdóttir, formaður Eflingar, lætur Ólöfu Helgu Adolfsdóttur, ritara í stjórn Eflingar, heyra það í pistli sem hún birtir á Facebook. Hún segir Ólöfu haga sér eins og helsta andstæðing verkafólks. Því sé hún nú í miklu uppáhaldi hjá Morgunblaðinu, að hennar sögn. Sólveig segir það skjóta skökku við við að Ólöf Helga sé á framabraut innan Samfylkinginarinnar en sé samt fyrst og fremst að stunda „auðvirðilegu niðurrifi og ógeðslegri aðför að hagsmunum verka og láglaunafólks“.
Pistill Sólveigar í heild sinni
Á Mbl.is er því velt upp hvort ekki sé hægt að reka mig og félaga mína úr Eflingu fyrir svokallaða “framkomu” okkar í garð Ólafar Helgu, sem er með beina útsendingu um hitt og þetta á Mbl.is þessa dagana. Það er gaman að fylgjast með mikilli og einlægri aðdáun Morgunblaðsins á pólitískum framadraumum Ólafar Helgu og Trump-ískri staðfestu hennar.
Rætt er við sérfræðing í vinnurétti sem segir að nei, það sé ekki svo einfalt að reka lýðræðislega kjörinn formann félagsins og meirihluta stjórnar. Það eru eflaust sorglegar fréttir fyrir hina og þessa, þeirra á meðal ritstjóra Morgunblaðsins. Það er ekkert talað um möguleikan á að grípa einfaldlega til valdaráns í umfjöllun Mbl.is en ég reikna með að sú nálgun verði rædd innan skamms í leiðara blaðsins og Ólöf hvött þar til dáða.
Ég veit að best væri fyrir mig að segja ekkert við þessari „fréttamennsku“ og einlægum áhuga Moggans á hetjudáðum Ólafar Helgu, konunnar sem ræðst ítrekað að félagsfólki Eflingar í sí-tryllingslegri tilraunum til að fá athygli í baráttu sinni gegn stjórn félagsins, formanni og samninganefnd, en ég fæ ekki lengur orða bundist. Hér segi ég því frá fremur nýliðnum atburðum í tilraun til að varpa ljósi á stöðuna í félaginu:
Eins og þið kannski munið gerði Ólöf Helga tilraun til þess að fá öllum þingfulltrúum Eflingar, 54 talsins, formanni félagsins þar með töldum, vísað af þingi Alþýðusambandsins í haust. Þetta gerði hún þrátt fyrir að kjörbréfanefnd sem starfaði í aðdraganda þingsins á vettvangi ASÍ hefði úrskurða kjörbréf þingfulltrúa Eflingar lögleg og þrátt fyrir lögfræðilegt álit sem að sýndi fram á val á þingfulltrúum hjá félaginu hefði verið í algjöru samræmi við lög, reglur og hefðir Eflingar. Þessi aðför Ólafar að þingfulltrúum Eflingar, í samvinnu við Agnieszku Ewu, forystusveit ASÍ-ung, og nokkra aðila innan úr SGS félögunum og sjómannafélögunum, vakti auðvitað upp mikil viðbrögð.
Eflingar-fólki var skiljanlega sárlega misboðið yfir þessari aðför að félagsfólki og að lýðræðislega kjörinni forystu félagsins, þessari grófu tilraun til að niðurlægja okkur á vettvangi hreyfingarinnar með því að láta reka okkur út af þinginu eins og hvert annað óboðið hyski. Nokkrum dögum eftir aðför Ólafar Helgu og félaga að Eflingar-fólki barst mér áskorun, undirrituð af því sem næst öllum þingfulltrúum Eflingar, þar sem skorað var á trúnaðarráð félagsins að beita 8. grein laga félagsins um að svipta Ólöfu Helgu og Agnieszku Ewu rétti til að sinna trúnaðarstörfum á vegum félagsins, vegna þess tjóns og ógagns sem þær höfðu bakað félaginu með fordæmalausu framferði sínu á þingi ASÍ. Þetta er einmitt sú grein laga félagsins sem að Mbl.is vísar til í umfjöllun sinni um hvort ekki sé hægt að reka formann, stjórn, og samninganefnd burt úr Eflingu svo að Ólöf Helga geti tekið við stjórnartaumunum.
Ég meðtók áskorun þingfulltrúa og tók hana mjög alvarlega. Undir hana ritaði stór hópur félagsfólks sem tekið hefur virkan þátt í baráttu félagsins. Sem formanni ber mér að hlusta á raddir félagsfólks. En ég komst að þeirri niðurstöðu að eiga samtal við þennan góða og mikilvæga hóp þar sem ég bað þau um að sýna því skilning að mín afstaða væri að ekki væri rétt að fara þessa leið. Að þær stöllur væru meðlimir í stjórn félagsins. Og að við þyrftum að gera okkar besta til að reyna að lifa með því, þrátt fyrir að framferði þeirra væri óþolandi og í raun ólíðandi. Ég veit að ef tillaga þingfulltrúa Eflingar hefði verið borin upp á trúnaðarráðsfundi hjá félaginu hefði hún verið samþykkt. Framferði Ólafar, stöðugar árásir á kjörna forystu félagsins, stöðugar tilraunir hennar til að hleypa upp starfi félagsins, innbrot hennar og Agnieszku Ewu í tölvupósthólf mitt og útprentanir á tölvupóstum mínum, aðför að störfum samninganefndar félagsins í harðri kjaradeilu; allt þetta hefur auðvitað gert það að verkum a þolinmæði fólks gangvart henni og varaformanni er á þrotum.
Ég tel enn að það hafi verið rétt ákvörðun hjá mér að eiga samtal við þingfulltrúa Eflingar og biðja þá um að hlífa Ólöfu Helgu við þeirri niðurlægingu að vera svipt rétti til að gegna trúnaðarstörfum. Þrátt fyrir að ég hafi í raun verið afstöðu þeirra sammála, að Ólöf Helga sé ekki fær um að starfa af trúnaði og hollustu við félagsfólk og að framferði hennar sanni það og sýni aftur og aftur. Þrátt fyrir að stjórn og nú samninganefnd hafi þurft að þola það sem virðist vera endalausan illvilja og hefnigirni Ólafar Helgu gagnvart lýðræðislega kjörinni forystu félagsins. Þrátt fyrir að aðför hennar að samninganefnd félagsins fari eflaust í sögubækurnar sem eitt af lágkúrulegustu dæmum sem fólk veit af um persónulega framasýki ofar hagsmunum annara.
Ég hef vonað og vona enn að Ólöf Helga leyfi lýðræðislega kjörinni forystu félagsins að starfa án þess að sitja undir stöðugum árásum. Ég hef vonað og vona enn að hún leyfi samninganefnd að halda áfram sínu mikilvæga og góða starfi í þágu félagsfólks, án þess að þurfa að þola að manneskja sem nýtur einskis trausts, manneskja sem setur eigin hagsmuni í heyranda hljóði og fyrir allra augum ofar hagsmunum allrar samninganefndarinnar og þeirra sem hún er að vinna fyrir, manneskja sem er með beina niðurrifs-útsendinu á Mbl.is bókstaflega heilu dagana til að grafa undan kjarabaráttu vinnuafls höfuðborgarsvæðisins, þröngvi sér upp á nefndinga í óþökk allra þar. Ég veit ekki alveg afhverju ég er að vona þetta.
Það er auðvitað orðið fremur augljóst að einstaklega ólíklegt er að svo verði. En kannski getur einhver liðsinnt Ólöfu Helgu og leitt henni fyrir sjónir að aðför sambærileg þeirri sem hún hefur staðið í gagnvart verkalýðsfélagi í kjaradeilu er sjaldséð, nema af hálfu harðsvíraðra atvinnurekenda og áróðursmeistara þeirra. Að kannski sé tímabært fyrir hana, sérstaklega með það í huga að hún er á framabraut innan Samfylkingarinnar sem vonarstjarna svokallaðs verkalýðsráðs flokksins, að snúa sér að öðru en auðvirðilegu niðurrifi og ógeðslegri aðför að hagsmunum verka og láglaunafólks. Kannski getur einhver hjálpað henni að skilja að það eru mjög raunverulegar og veigamiklar ástæður fyrir því að hún er ekki velkomin á fundi samninganefndar og að sem fullorðin manneskja eigi hún að reyna að horfast í augu við eigið framferði og þær afleiðingar sem að það hefur haft.
Að lokum: Vegna mikils áhuga vissra aðila á samsetningu samninganefndar Eflingar, vegna áróðurs félaganna Ólafar Helgu og Halldórs Benjamíns um að eitthvað sé athugavert við nefndina, vil ég koma þessu á framfæri:
Það voru 89 Eflingarfélagar skipaðir í samninganefnd Eflingar á fundi trúnaðarráðs þann 20. október 2022. Af þessum 89 starfar 61 undir kjarsamningum við SA og 28 undir opinberu og afleiddum samningum. Líkt og ávallt hefur verið hjá Eflingu þá starfar ein sameiginleg samninganefnd fyrir alla kjarasamningagerð meðan samningar eru lausir, en nefndinni er heimilt að skipta með sér verkum skv. 18. grein laga Eflingar.
Myndin sem fylgir er úr frétt Mbl.is í dag. Ég ítreka að þarna er verið að ræða hvort að ekki sé hægt að reka formann og stjórn Eflingar úr félaginu svo að Ólöf Helga geti farið sínu fram.
