Davíð Oddsson, ritstjóri Morgunblaðsins, fagnar 75 ára afmæli í dag. Tímamótanna er minnst með heilsíðugrein í blaði hans sem Hannes Hólmsteinn Gissurarson prófessor ritar. Þetta er stærsta umfjöllun Davíðs um sjálfan sig síðan stórfrétt var birt á síðu 2 fyrir nokkru í tilefni þess að málverk var afhjúpað af honum í Seðlabankanum.
Það kemur ekki á óvart að Hannes Hólmsteinn lýsir Davíð sem stórmenni í sögu þjóðarinnar. Ekki verður annað lesið úr greininnni en að Davíð hafi verið fullkominn í störfum sínum. Sú söguskoðun kann þó að vera umdeild í ljósi þess að hann var nánast borinn út úr bankanum á sínum tíma og sakaður um ýmis afglöp í aðdraganda og í tengslum við hrunið. Þá þótti ýmislegt á ferli hans sem stjórnmálamanns vera vafasamt. Þar má nefna Bolludagsmálið fræga þar sem Hreinn Loftsson, hæstaréttarlögmaður og fyrrverandi aðstoðarmaður Davíðs, átti í hörðum átökum við fyrrum yfirboðara sinn og ljóstraði upp um eitt og annað.
„Þótt skýrsla rannsóknarnefndar Alþingis á bankahruninu frá árinu 2010 sé meingölluð, kemur skýrt fram í henni, að sem seðlabankastjóri varaði Davíð Oddsson margsinnis við hinum öra vexti bankanna og undirbjó í kyrrþey aðgerðir. Þar réð þó frekar tilfinning gamalreynds stjórnmálamanns en talnaflóð úr skýrslum alþjóðastofnana, niðurstöðum matsfyrirtækja, álitsgerðum hagfræðinga og endurskoðuðum ársreikningum bankanna, sem allt hneig í aðra átt,“ skrifar Hannes Hólmsteinn og segir með ólíkindum að vinstri stjórn Jóhönnu Sigurðardóttur hafi hrakið þann mikla efnhagsspeking úr bankanum …