Ómar Örn Reynisson, fæddur árið 1996, hefur verið dæmdur í þriggja ára fangelsi fyrir nauðgun. Dómur féll þann 11. janúar síðastliðinn en dómur birtist ekki fyrr en í dag á netinu. Ómar Örn hefur verið leikmaður hjá knattspyrnufélaginu Ægi um nokkurt skeið en hann lék síðast með liðinu árið 2021.
Nauðgunin átti sér stað árið 2020 en henni er lýst svo í ákæru:
„fyrir nauðgun, með því að hafa að morgni […] 2020, á þáverandi heimili […], haft samræði og önnur kynferðismök við X, án hennar samþykkis, með því að stinga fingri í leggöng X er hún svaf og eftir að X hafði látið hann vita að hún vildi þetta ekki og sofnað á ný, haft við hana samræði, en hún gat ekki spornað við verknaðinum sökum svefndrunga, og eftir að hún vaknaði og ákærði varð þess var, haldið áfram að hafa við X samræði án þess að hafa til þess samþykki hennar og beitt hana ofbeldi og ólögmætri nauðung, með því að halda henni fastri og láta ekki af háttseminni þrátt fyrir að X hafi látið hann vita að hún vildi þetta ekki, grátið og reynt að ýta honum burt og losa sig.“
Konan og Ómar kynntust á Tinder en stúlkan er sögð nokkuð yngri en hann. Í dómi segir að þau hafi hittst af og til um nokkurt skeið, horft á Netflix og haft kynmök. Eftir að hún sofnaði vaknaði hún við Ómar að brjóta á henni, líkt og fyrr segir, en hann hélt henni þannig að hún gat ekki losað sig.
Hún leitaði til Neyðarmóttökunnar skömmu eftir atburðinn og töldu þeir sem tóku á móti henni að hún hefði orðið fyrir miklu sálrænu áfalli. Líkamsskoðun leiddi í ljós áverka sem almennt eru taldir benda til nauðgunar.
Um hálfu ári eftir atvikið sendi Ómar stúlkunni skilaboð á Snapchat. Þeim svaraði stúlkan svo:
„Hæ, ég skil ekki alveg af hverju þú ert allt í einu að senda mér snöpp aftur? Mér finnst lágmark að þú biðjir mig afsökunar á því sem þú gerðir mér síðast þegar við hittumst. Ég bað þig ítrekað um að hætta en þú hundsaðir það og hélst áfram gegn mínum vilja.“
Ómar svaraði: „Fyrirgefðu“ og sleit síðan vinskap við hana á Snapchat. Ómar neitaði sök og útskýrði þessa afsökunarbeiðni sem afsökun á því að hafa sent henni skilaboð.